Mendi lasterketak modan jartzen ari diren honetan, Hernaniko denda batek janzten dizkie oinetakoak euskaldunik azkarrenei: Ibai Mendi dendak. Hain justu, Euskal Selekzioko 10 kide Hernanin izan ziren larunbatean, eta jendearen galderei erantzun zien, besteak beste. Jokin Lizeaga urnietarra falta bazen ere, hor ziren: Aitziber Ibarbia, Nerea Amilibia, Hassan Atichao, Oier Ariznabarreta, Iban Otamendi, Fernando Etxegarai, Leire Agirrezabala, Elena Calvillo, Aritz Ejea eta Imanol Goñi.
Goi goian dabil Euskal Selekzioa, Eneko Allende selekzionatzaileak azaldu zuen gisan, «Espainiako Txapelketan, mutiletan lehenengo taldea izan gara eta nesketan bigarren. Munduko Kopan lehenengo hamarretan sartu nahi genuke taldekoren bat, eta horretarako 5-6 egunez entrenatzen dugu astean».
Ibai Mendiko oinetakoek ere lagunduko dute goi maila horretan ibiltzen, inongo zalantzarik gabe.