Babes Ofizialeko 88 etxebizitza eraikiko dituzte Sagastiyan, Etxeberri auzo ondoan. Etxebizitzak erosketakoak izango dira eta 2015 urterako egon behar dute bukatuta. Ohi bezala, Etxebidek aldez aurretik egingo du zozketa, eta parte hartzeko, izena emanda egon beharra dago.
Izena emateko bi modu
Izena, Etxebiden apuntatuta daudenek bakarrik eman dezakete, eta horretarako bi modu daude: www.etxebide. euskadi.net helbidean sartu eta Hernaniko 88 babes ofizialeko etxebizitza sustapenean izen-ematea linkaren gainean klik eginda; edo Eusko Jaurlaritzak Donostian duen egoitzara joan, eta Zuzenean Arreta Zerbitzuan izena emanda (Andia kalea, 13). Izena emateko epea uztailaren 22ra arte egongo da zabalik.
Etxebidetik jakinarazi dute, epe horretan izena ematen ez bada, interes ezaren seinale izango dela. Bestalde, gogoratu dute parte hartzeko baldintzak betetzen ez dituztenen eskaerak baztertuak izango direla.
88 etxebizitza, hiru eta bi gelakoak
88 etxebizitza egingo dituzte, guztiak erosketakoak. Horietatik 84 etxebizitza hiru gelakoak izango dira, bi komunekin; 75,74 eta 90 metro2 artekoak. Lau egokitutako etxebizitzak izango dira, bi logelakoak eta komun bakarrekoak; 79,47 metro2-koak.
Prezioei dagokienean, txikienak 111.691,20 euro balioko dute; eta haundienek 163.698,16 euro.
Uko eginez gero, bi urte Etxebidetik kanpo
Etxebidetik gogoratu nahi dute, etxebizitza tokatu eta uko egiten dutenei baja emango zaiela; ondorioz, bi urtetan debekatua izango dutela zozketetan parte hartzea.