Hernaniarrek dezenteko partea izango dute Gipuzkoan antolatzen den lehendabiziko Rogainean. Bizibiziki enpresak eta Irungo Mendizaleen Orientazio Sailak antolatu du orientazio proba berezi hori. Aurkezpenean hor ziren: Ekaitz Zubeltzu (Bizibiziki), Alberto Tapiz eta Rafa Romero (Irungo Mendizaleak).
Orientazio proba,
federatu eta herritarrentzat
Rogainea da orientazio proba bat, bikoteka edo taldeka (gehienez bost) egin litekeena, eta bakoitzak nahi duen erritmoan. Guztira 6 ordu inguruko proba da, eta federatuek eta edozein herritarrek parte hartu dezake. «Hori bai, komeni da orientazio gaitasuna izatea, eta fisikoki pixka bat prestatuta egotea. Baina hala ere, batzuk bokadiloak hartuta joango dira, eta beste batzuk ez dira geratu ere egingo», dio Rafa Romerok, proba antolatzen ibili den hernaniarrak.
Ikastaroa eta proba
Irailaren 7an da proba, Lizarrustin, Pirineoetako rogainea proben ligan sartuko dena. Esperientziarik ez dutenek aukera dute astebete lehenago ikastaro bat egiteko, irailaren 1ean.
Izenematea zabalik dago, eta apuntatzeko edo informazio gehiago lortzeko, web orrialde bat jarria daukate: orientimos.blogspot.com.es.