Hernaniko alderdi sozialistak Lizeagako bidegorriaren proiektuaren kontra dagoela jakinarazi nahi du, Kronikara bidalitako prentsa oharrean. Dio, Bildu, gobernatzeko iniziatibarik ez izatetik, arazoak sortzera pasa dela: «asteleheneko Hirigintza Batzordean Lizeagako bidegorriaren gaia aztertu zen eta honek Urumea ikastolari eragingo dion arazoa. Gure ustez, Bilduk arazoa sortu du ez zegoen tokian, eta guztia, egoskorkeriagatik. Dirudienez, Lizeagako bidegorria aurten egitea erabaki du Udalak: «bidegorriaren ondorioz aparkalekuak gutxituko dira. Eta aparkaleku arazoa konpontzeko okurritu zaie Urumeako patioa etenik gabe irekita mantentzea, aparkatzeko»
«Oposizioak eman
zituen zenbait soluzio
Hirigintza Batzordean»
PSE-EEk dio, asteleheneko Hirigintza Batzordean, oposizioak eman zituela soluzio batzuk: «Urumeako ikastola aurten botako ez dutenez, eskatu genuen, aurten horretarako onartua zegon aurrekontua Gay Murreko patioa estaltzeko erabiltzea. Gainera, uste dugu, Eusko Jaurlaritzan subentzioa lortu litekeela obra hori egiteko».
Alderdi sozialistaren ustetan, aurtengo aurrekontuetan Urumeako eraikina botatzeko onartua zegoen partida bidegorria egiteko erabiliko da: «arazoak sortzeko erabiliko da diru hori. Argi dugu, eraikina ezingo dela bota Hezkuntzak ikasleak bertan mantetzen dituen bitartean. Oposizioak eman dituen zenbait soluziorekin, bidegorriaren obra atzeratzea proposatzen dugu, eraikina bota bitartean, soluzio merkeena baita. Horrela gainera, urteetako eskariari erantzuna emango litzaioke: Gay Mur eraikineko patioa estaltzea»