...eta hiru! Gaur dute hirugarren eta azken eguna Martindegiko San Ferminek, eta herri kirol kutsuan joango da eguna beti bezalatsu. Eneko Otaño aizkolari beizamarrak eta Iker Vicente Otsagikoak elkarrekin jokatuko diote Jon Irazu beteranoari. Iaz beteranoak irabazi zuen, baina aurten, adituek diote nahiko lan izango duela bi gazteori irabazten.
Aizkora eta harrijasotzea elkarrekin joan ohi dira sarri, eta gaur ere hala izango da. Idoia Etxeberriak hartu behar ditu lantegi horiek.
Horiek eguerdian izango dira, baina festa ez da, ez hor hasiko, eta ez hor bukatuko. Aurretik meza dute, eta hamaiketakoa ere bai, Oialume tabernaren eskutik. Ondoren berriz, bertsolariak: Andoni Egaña, eta Amets Arzallus. Txapelketa nagusiari begira hendaiarra ze puntutan dagoen ikusteko aukera polita, gaurkoa. 13:00ean eta 19:00etan dute saioa. Trikitilari txapelketa arratsaldean da, bost bikoterekin; gero toka eta abar luze bat, azkenean dantzan bukatzeko.
Atzo eta herenegun ez zen jenderik falta izan Oialumen. Beste behin, Patxin eta Potxin protagonista izan ziren ostiralean, eta xexenak atzo.
Uztailak 7, igandea
- 10:00 Auzoko hildakoen alde Meza (ondoren hamaiketakoa, Oialume tabernaren eskutik).
- 11:00 Bermuta.
- 12:00 Euskal Festa
Aizkolariak: Eneko Otaño eta Iker Vicente bikote gaztea
Jon Irazuren aurka.
Harrijasotzaileak: Idoia Etxeberria. - 13:00 Bertsolarien saio berezia. Andoni Egaña eta Amets Arzallus.
- 17:00 XVII. Trikitilari Gaztetxoen Txapelketa.
- 18:00-19:00 Toka Txapelketa Nagusia (Gurutzeta Sukaldeak Antolatua).
- 19:00 Bertsolarien bigarren saioa: Egaña eta Arzallus.
- 20:00 Dantzaldia Bide batezekin.
- 23:00 Festei bukaera emateko kalejira auzoan barrena.