Urumea ikastolako guraso elkarteak jakinarazi duenez, 1.188 sinadura lortu dituzte, jolas-tokia beste urtebetez luzatzearen alde. Udalak oraindik erantzun garbirik ez diela eman, eta mobilizazioak egiten jarraituko dutela adierazi du guraso elkarteak. «Patio hori urtebetez erabiltzen jarraitzeko eskubidea nahi dugu, besterik ez. Bidegorria egin dezatela geroago», adierazi diote Kronikari.
Sinadurak udaletxean,
idatzi batekin batera
Guraso elkarteak sinadura guztiak udaletxean aurkeztu zituen joan den ostiralean, eta Alkatearekin hitz egiteko eskatu dute idatzi baten bidez. «Aste bakar batean 1.188 sinadura jaso ditugu, beraiek ere uste dutelako patiorik gabeko ikastola bat ez dela leku duin eta seguru bat. Hori jakinarazi nahi diogu udalari, eta eskaera bat sartu dugu, Alkatearekin bilera bat egiteko».
Kontzentrazioa ostegunero
Ostegunero kontzentrazioa egingo dute Urbieta kalean, 17:00etan. «Eskerrak 1.188 pertsona horiei, gure seme-alabengan eurenean bezala pentsatu dutelako. Gai hau laster konpontzea espero dugu; bitartean, osteguneko ferian elkartzen jarraituko dugu».