Iritsi da deskantsurako unea. Bost egunetan kale, taberna, txosna, plaza, koadrila, etxe, soziedade eta abarretan San Joanak ospatu eta gero, atzo bukatu ziren, urteko festarik preziatuenak. Hasi bezala, bukatu ere, Goiz Eguzkiko lagunen eskutik bukatu ziren. Gauerdia pasa bezain pronto jaitsi zuten bandera, festak, datorren urtera arte agurtuz.
Ekitaldiak atzo, egun osoan
Eguzkia izan zen nagusi atzo, egun osoan, San Joanetako bost egunen antzera. Azkeneko Sokamuturra eta Axeri Dantzaren bueltan bildu ziren, goiztiarrenak.
Goizeko 11:00ak inguruan Plaza bete-bete zen. Batetik, Axeri Dantzako azken astinduak jaso zituztenak; eta bestik, Intxaurburu eta Telleriaren idi parearen zain zeudenak. Atzo Telleriak irabazi zuen dema, 41,5 plaza eginda; Intxaurburuk 38 plaza egin zituen. Baserritarren festak Tilosetan izan zuen segida; aizkoran Atutxa IIak Otaegi baino azkarrago moztu zituen, 20 enborrak. Eta espektakuluarekin jarraituz, Iñaki Perurenak jarri zuen ginda, bost txandatan harria jasotzen.
Merkatariak gogoan,
San Joan Konpartsak
Jendetza erakarri zuen beste behin, San Joan Konpartsaren karrozak. Atzo Hernaniko lehengo eta oraingo merkatariak ekarri zituzten gogora.