San Joan sua egiteko dena prest du Roxario Pikabea basozainak, zazpigarren urtez. Kamioi koxkor bat egur ekarri dute aurten Aparraindik eta azpitik ongarri pixka bat jartzea izango da trukoa, su ederra egiteko. Izan ere, udaberri hezea joan da aurtengoa eta egurrean nabari da: «euri asko egin du eta egurra heze-hezea dago, ez du lehortzeko astirik izan. Gasolinarik ezin dugu erabili sua egiteko eta ongarri pixka bat jarri beharko diogu azpitik, bustiari zeozer lehorra sartzeko. Lanak izango ditugu aurten, sua egiteko». Urteko gaurik luzeena da gaurkoa, sorginduena, eta suak, kolore berezia emango dio, iluntzeari. 21:30etan piztuko du Pikabeak San Joan sua, eta itzaltzeko agindua ere berak du, handik ordu erdi ingurura. Sua ikustera gerturatzen direnentzat gomendioak ere badira aurten: sutara ezer ez botatzea eta jarritako segurtasun eremua errespetatzea.
Musika eta dantza
Kantaita eta aurreskua ere izango dira aurten suaren bueltan. Indarra hartu bezain pronto ohiko abestiak kantatuko dizkiete Kantaitako kideek eta aurresku herrikoia ere, dantzatuko da.