Bi lan istripu izan dira aste honetan Hernanin. Ostegunean gizonezko bat hil zen, asteartean izandako lan istripuaren ondorioz. Errezildarra zen eta Pagoaga bailaran izan zuen istripua, bertako zentral hidroelektrikoan grua bat montatzen ari zirenean. Pisu haundiko pieza bat gainera erori zitzaion.
Ostegunean, baita ere, Hernaniko gazte bat larri zauritu zen. Erredurak dauzka gorputzaren ehuneko haundi batean. Gurutzetako erietxera eraman behar izan zuten urgentziaz.
Doluminak, Udalak
Hernaniko Udalak dolumina azaldu nahi die familiari eta lagunei eta eskatzen du, «lan arriskuen prebentzioan beharrezkoak diren neurri guztiak aplikatzeko, berriro lan istripurik gertatu ez dadin».
Politika eraginkorren beharra
Buruntzaldeko LABek ere samina eta elkartasuna adierazi die langile horien senideei eta gertatutakoa salatu du. «Enpresariei prebentzio eta lan osasun politika eraginkorrak ezartzea exijitzen diegu eta administrazioari, kontrola areagotzeko. Lan istripu gehiagorik ez! prekarietatea hiltzailea».
Alderdi sozialistak ere babesa azaldu die langileen familiei. «Gizarteari eragiten ari zaion gaitz hau geratu beharra dago eta neurriak hartu behar dira».