Urriaren 17an, 35/02 sumarioaren epaiketa hasiko da espainiar estatuko Auzitegi Nazionalean, herriko tabernen kasua deitu diotena. Bertan, ezker abertzaleko 40 kide epaituko dituzte, tartean, hernaniar bat: Juanpe Plaza. 10 urteko kartzela zigorra eskatzen diote. Garin taberna eta Plaza Berriko lokal bat ere kasu honetan sartuta daude. Hori guztia salatzeko, kontzentrazioa deitu zuen Hernaniko Sortuk ostegunean. «Epaiketa politiko baten atarian gaude berriro. Eta gobernu espainiarraren helburua da Euskal Herrian irekitako agertoki berria erasotzea; bakea eraikitzeko prozesuari eraso egitea», azaldu zuten.
«Gatazka betikotu
nahi du PPk»
Euskal Herriarentzat, estatuak ez daukala agenda demokratikorik gaineratu zuten: «Bakearen beldur da, badakielako herri honi bere etorkizuna erabakitzeko aukera irekitzen zaionean, estatu bat eraikitzea erabakiko duela gehiengoak. Horren jakitun, gatazka betikotu nahi du PPk».
«Neurriko erantzuna
emango diegu»
«Euskal herritarrok, bake eta askatasun prozesuaren alde gauden guztiok, neurriko erantzuna emango diegu herri moduan, arrazoi demokratiko osoz, erabakiak hartuz eta aldebakartasunetik. Konponbide prozesuari eutsi dio Euskal Herriko gehiengo politiko eta sozialak, nazioarteko komunitatearen eskutik, eta bakea eraiki eta askatasuna eskuratzera doa gure herria», azpimarratu zuten.
Indarrak pilatzeko dei egin du Sortuk, «epaiketa eta eraso politikoen aurrean, konponbidearen alde egiteko». Bide horretan, kalera atera eta mobilizatzeko beharra azpimarratu du. «Borrokaz egin du gure herriak aurrera eta borroka eta lanaz eskuratuko dugu bakea eta askatasuna». Datozen hilabeteetan ekimen ezberdinak izango dira herriz herri.