Hernaniko Udala eta taldeak bileretan ari dira, kartelak non eta nola jarri erabakitzeko. Hernaniko Kaxkoa garbiago edukitzeko helburuarekin ari dira zehazten ze aukera dauden kartelak jartzeko, eta nola komeni den egitea.
Kartelak, paneletan
Orain arteko bileretan aipatu denez, kartelak jartzeko panelak izango dira, eta handik kanpora ez dira jarriko, dendaren batek bere eskaparatean jartzeko baimena ematen ez badu behintzat, edo taberna barruan jartzeko baimena ematen ez bada. Kartelak zeloarekin jarriko dira, eta jartzera dijoanak berea jarri aurretik, fetxaz pasatako kartelak kendu egingo ditu. Udalak hilean behin garbiketa egingo du, hileko azken astelehenetan.
Panelak non eta nolakoak
Bi panel mota jarriko dira kartelak pegatzeko: zeramikazkoak edo fenolikozkoak. Hainbat lekutan izango dira panel horiek: Biteri kultur etxean, kiroldegiko bi sarreretan, anbulatorioan (baimena ematen badute), Tilosetako komunen inguruan, Kixkaleko ixkinan (baimena ematen badute), Plaza Berritik behera: Kardaberaz eta Kale Nagusian, Zinkoenean, Gudarien plazan (bi panel), Karabelgo igogailu ondoan, Udaletxeko atzekaldean (Portalezkanpon), Atletismo pistan. Horiez gain, autobusen kristalezko markesinetan.
Azken ikutuak, ostegunean
Oraindik badira erabaki beharreko kontuak, panelen neurriak eta materialak, eta abar... eta ostegunean beste bilera bat jarri dute. Interesatu guztiei dei egin diote azaltzeko, 19:00etan, Biterin.