Bertso pelota ez da berria. Lehendik ere egin dira antzeko saioak makina bat frontoitan. Ugaldetxon ere bai, besteak beste. Hala ere, lehenengo aldia izango da Ereñotzuko frontoian egiten dela. Izan ere, Ereñotzuko frontoia orain bi aste inauguratu zen. Bertso pelota bihar izango da, 12:00etatik aurrera.
Forma berria
Bertso pelota formula berria ez bada ere, forma berria eman nahi izan diote. Halaxe sortu dute egitasmo berria Añorgako pelotari eta bertsolari batzuk, eta Lanku elkarteak. «Euskal kulturan erreferenteak diren bi arlo hauek uztartzea pentsatu genuen eta emanaldi bat eskaintzea, jaiei begira. Pelota askotan, formalegia da eta beste ikutu bat eman nahi genion», azaldu dio Kronikari Iker Urmeneta pelotari añorgatarrak.
Lau pelotari elkarren aurka neurtuko dira, bikoteka. Eta bikote bakoitzak bertsolari bana izango du botilero lanetan. Pelotariak honakoak izango dira: Urmeneta-Aranburu eta Lizaso-Urruzola. Bertsolariak, berriz: Axier Azpiroz eta Xabier Legarreta.
Bertsolariek partidua hasi aurretik kantatuko dute, hau da, pelotariak beroketetan ari direnean, eta ondoren, atseden momentuetan ere aprobetxatuko dute saltsa pixka bat jartzeko, pelotariei aholkuak emanez eta publikoa zirikatuz.
Aurkezlea ere izango du bertso pelota emanaldi honek. Ekain Ormazabal izango da, hain zuzen.
Herritarren partehartzea bultzatuz
Urmenetak azpimarratu duenez, «egitasmo honen asmoa ere bada herritarren partehartzea bultzatzea». Hori horrela, emanaldi bakoitzean, dagokion herriko pelotariak eta bertsolariak sartzen ahalegintzen dira. Pelotarien kasuan, ez dute aukerarik izan ereñotzuko pelotariren bat lortzeko. Bertsolariei dagokienean, Xabier Legarreta aranoarra gonbidatu dute, Ereñotzurekin eta Hernanirekin harreman haundia duena, eta Axier Azpiroz zubietarra, Hernaniko Bertso Eskolako kidea dena.
Partehartzea bultzatzeko, epaile eta artekari lanetan auzotarrak jarriko dituzte. Eta apustuak egiteko aukera ere izango da. Euro bateko apustuak izango dira eta tanteoa asmatzen duenak saski eder bat irabaziko du.
Umeentzako tartea ere bai
Bertso pelota, Irrien Lagunek babestua ere bada eta umeentzako tartea ere izango da. Txapen jolasa egingo dute eta Irrien Lagunen materiala banatuko dute, besteak beste.
Ilusioa, frontoi berrian
aritzeak
Ereñotzukoa, frontoi berria izateaz gain, urtetako lanaren emaitza izan da eta horrek ilusio berezia egiten duela azaldu du Urmenetak. «Gainera, pelota eta bertsolaritza uztartuz zerbait desberdina eskaini nahi izatea ere poztekoa da», gaineratu du.
Giro ona segurua izango dela azpimarratu du orain arteko emaitzak ikusita: «Orexan 100 herritar inguru dira eta 70 egon ziren emanaldian, ia herri guztia. Eta Oreretan, 150 inguru etorri ziren. Jendea animatzen da apustuak egitera eta oso giro polita izan dugu bietan».
Aurrera begira beste emanaldi batzuk ere badituzte: hilaren 21ean Antiguan, 23an Arizkunen eta uztailaren 25ean Zubietan.