elias Querejeta zinegile hernaniarra hil zen joan den asteburuan, eta Hernaniko PSE-EE alderdiak proposatu du omenaldi bat egin beharko litzaiokeela. Kronikara bidalitako prentsa oharrean dioenez, udaletxeko alderdi guztiei egin diote proposamena, «pertsonaia hain ilustreak merezi duelako». Querejetaren familiari doluminak bidaltzen dizkio alderdi sozialistak prentsa oharrean, eta Querejeta goraipatzen du bere ibilbideagatik. «Elias Querejetak Hernaniren izena beti berekin eraman du, munduan barrena. Euskaldun unibertsal horietako bat zen Elias, Chillida, Oteiza edo Arzak den gisara. Sari hori ez du jaso baina kandidato ona litzateke». Zinegile gisara zen ezagunena, PSE-EEk dioen gisan, «ahaztu ezinezko pelikulak egin zituen: El jardín de las delicias, Cría Cuervos, La familia de Pascual Duharte, Historias del Kronen, Los lunes al sol.... eta abar. Hainbat sari jaso ditu horregatik, baina bada beste alde bat ere, azpimarratzekoa, askatasunaren eta bakearen alde egindako lana. Eliasek frankismo garaitik egin du borroka hori. ETAk armak utzi zituenean idatzi zuen, inork ez daukala legitimaziorik bere egia inposatzeko, egia absolutua hori balitz bezala».