Iheslarien ekitaldi nazionalera joateko autobusa antolatu dute Hernanitik

Datorren larunbatean, ekainaren 15ean, Iheslarien  Ekitaldi Nazionala antolatu dute Miarritzen. Herna­niarrek autobusean bertara­tzeko aukera izango dute, nahi izanez gero. Autobusa goizeko 10:00­etan aterako da Atse­gin­degitik, eta Miarri­tze­ko ekitaldi guztiak bukatzear direnean, arratsaldeko 20:00ak aldera itzuliko da. Txartelak salgai daude dagoeneko, 30 euroan, Garin, Aker eta Rioja Tabernetan.
Iheslarien eguneko ekitaldi nagusia goizeko 11:30etan izango da, Irati erakustazokan. 13:30etan herri bazkaria antolatu dute, eta txartelak bertan egongo dira salgai, 20 euroan. Eta eguna bukatzeko, musika: Dohainik, Ga­tibu, Gose,  Iheski eta Ze esatek! taldeek kontzertua eskainiko dute.

`Herria dugu arnas´  
izango da lema
Ekimen berria jarri du mar­txan iheslari politikoen koletiboak, Herria dugu arnas izena duena. Hernaniar eta euskal herritar guztiak gonbidatu nahi dituzte, datorren astean, Miarritzera: «herria eraman genuen gurekin, he­rria bizi izan dugu urrun egonik ere, eta herria da gure hatsaren ezinbesteko oinarri. Ekaina­ren 15ean Miarritzeko Irati aretoan ikusiko dugu elkar».
Idatzitako adierazpenean besteak beste diote, Euskal Herrian bizi nahi dutela, libre: «Munduko bazter ani­tzetan ehundaka iheslari gaude, eta Euskal Herrian libre bizitzeko eskubidea jorratu nahi dugu, mundutik herrira itzuli».
Arazo politikoari dagokionean, soluzioa konponbide integrala dela azpimarratu dute: «arazo politikoaren konponbide integrala bul­tzatu nahi dugu, horrek ekarriko duelako gure arazoa behin betiko ezabatzea».

Apirilean, Hernaniko
iheslarien eguna
Apirilaren 20an Hernaniko Iheslarien eguna antolatu zuten aurreneko aldiz Zibu­run. Dozenaka herritar gerturatu ziren, egoera horretan, Ipar Euskal Herrian bizi diren 6 hernaniarrei babesa ematera. Iheslarien hitzak izan ziren bereziki protagonista, eta ondoren, festa: bertsolariak, bazkaria, dantzaria...