Igerileku irekietako taberna oraindik egokitu ez izana salatu dute EAJ-PNV eta Hamaikabat alderdiek, Kronikara bidalitako prentsa oharrean. Diotenez, ulertezina da, kontuan izanda, taberna diru sarrera dela: «berehala zabalduko dituzte igerileku irekiak, eta ulertezina da taberna oraindik egokitu gabe egotea». Bi alderdiek azaldu dutenez, egokitze lanetarako 60.000 euro daude aurreikusita 2013ko aurrekontuetan: «diru partida bat kontuan hartua dago aurtengo aurrekontuetan, eta Bilduko Gobernua ez da gai izan azken sei hilabete hauetan tabernan egin beharreko lanak egiteko. Beste behin, egoera kaxkarrean irekiko da».
«Taberna egoki jarriz gero, diru sarrera inportantea izan daiteke» Oposizioko bi alderdien esanetan, instalazio egokia izateak onura ekonomikoa ekarriko luke Udalarentzat: «taberna ondo, egoki jarriz gero, sarrera ekonomikoan nabarituko da aldea eta horrek onura ekonomikoa ekarriko lioke Udalari. Dirudienez, aurtengo urtea ere urte galdua izango da, eta gutxienez 2014ra arte itxaron beharko dugu». Azkenik, prentsa oharra bukatzeko, Luis Intxauspe alkateari gehiago saiatzeko eskatu diote: «herriko gestioan saiakera haundiagoa eskatzen diogu Alkateari, legegintzaldiaren erdialdean gaude, eta penagarria ari da izaten»