Gipuzkoako bigarren sagardo onena da Altzueta Sagardotegikoa; hala saritu zuten larunbatean, Gipuzkoako Sagardo Txapelketako finalean. Hamabi edizio egin dira orain arte, eta Altzuetak sei finaletarako pasea lortu du: hirutan geratu da bigarren postuan eta behin hirugarren; beste bietan finalista izan da. Emaitza ederrak dira, Ibon Alkorta sagardogilearentzat: «aurten bagenuen esperantza, eta bigarren geratu gara. Saria da zentzu guztietan: sagardotegiarentzat, gure sagardoarentzat eta egiten dugun lanarentzat. Bezeroen zorion hitzak ere jaso ditugu, eta hori ona da». Gorputz sendoko sagardoa dute aurten Altzuetan, borobila, fruta usaiduna, Ibon Alkortak dioen moduan, «sagardo modernoa, gaur egungoa». Probatu nahi duenak Hernaniko taberna eta elkarteetan du aukera. Eta erosi nahi duenak Altzuetatik pasa besterik ez du; botilak bertan dituzte salgai.
Iparragirre eta Oialume Zar ere, finalean
Finala Donostiako Euskal Gastronomia elkartean jokatu zen. Sei sagardotegi iritsi ziren 12garren edizio honetako final haundira, eta tartean gertuko bi: Osiñagako Iparragirre eta Martindegiko Oialume Zar sagardotegietako sagardoa.