Antton Zabala eskalatzaile hernaniarrak izango du Garagardo Azoka irekitzeko ohorea, aurten. Gaur egingo du aurreneko garagardo tragoa, 19:00etan, eta handik aurrera, nahikoa garagardo eta jaki edan eta jateko aukera izango dute, bertaratzen diren guztiek.
Igandera bitartean, zabalik
Lau egunez izango da errugbia eta garagardoa uztartzeko aukera. Gaur eta bihar 19:00etatik aurrera izango da azoka zabalik; eta larunbat eta igandean, 13:00etan hasita. Egun guztietan, gauerdira arte izango da zabalik.
Jakiari eta edanari dagokionean, ohiko ukondoa, saltxitxak, oilaskoa, tripakiak, patatak, lakoia... izango dira aukeran. Garagardoa litro laurden edo erdian salduko dute; hurrenez hurren, 3,50 eta 4 euroan.
Zaleak omenduko
dituzte, igandean
Zaleekin harreman haundia izan du klubak beti, batez ere, halako jaietan. Aurten omendu egingo dituzte erlazioa sendotu eta eskerrak emateko. Bazkaria antolatu dute igandean, omenaldi gisa. Menua: Paella, postrea eta garagardo bat, 10 euroan helduentzat eta 6 euroan 14 urtez azpikoentzat; txartelak azokan egongo dira salgai.
Tokata, larunbatean
Herritarrek errugbia ezagutu eta ondo pasatzeko, Tokata herrikoia antolatu dute larunbatean, 16:30etan. 8 minutuko partiduak izango dira, eta talde bakoitzak 5 jokalari izango ditu. Izena emateko, idatzi: hernanicre@ gmail.com. Partiduak bukatuta, Landaren dutxatzeko aukera izango da; eta ondoren, hirugarren denbora antolatu dute.