Hernaniko bertso eskolako 7 kide, txapelketa nagusian

Txapelketen txapelketa deitu izan zaio Euskal Herriko Bertsolari Txapelketa Nagu­sia­ri. Inbutu estua izaten da, eta bertsolari bakoitzak bere herrialdean lortzen du plaza, Euskal Herrikoan kantatzeko. Irailetik aurrera, 43 bertsolari ariko dira, eta tartean Herna­nik ordezkaritza polita dauka, berriz ere, bertso eskolako 7 kide hortxe izango baitira, onenen artean. Maialen Lu­janbio, Unai Agirre, Iñaki Zelaia, Agin Rezola, Beñat Gaz­telumendi, Aitor Mendi­lu­ze eta Jexux Mari Irazu dira Hernaniko bertso eskolan arituak edo ari direnak; lehenengo hirurak hernaniarrak, eta besteak Astigarraga, Añorga, Andoain eta Larraulgoak.

Momentuko onentsuenak
Zail da hain maila altuko koadrila osatzerik, bertso munduan. Lau urtean behin elkartzen dira momentuko onenak edo onentsuenak, eta ez da hanka-sartzetarako lekurik izaten. Maialen Lu­jan­bio hor izango da, aurreko Euskal Herriko txapelduna, eta Amets Arza­llus ere bai, ger­tu gertutik txapelari begi­ra­tu zion lapurtarra. He­rrialde bakoitzeko txapeldunak ere ez dira faltako: Ipa­rraldeko txapelduna, Ar­zallus bera; Gipuzkoako txa­pelduna, Aitor Sarriegi; Biz­kai­koa, Arkaitz Estiballes; Na­farroakoa, Xabier Silveira; eta Arabakoa, Oihane Perea. Hu­rrengo sailkatuak ere hor dira, 43 osatu arte: Gipuzkoako 21, Bizkaiko 11, Iparraldeko 5, Nafarroako 4 eta Arabako 2.

Irailean hasi, abenduan buka
Udazkenean jokatu ohi da beti txapelketa nagusia. Irai­laren 29an hasiko da, Villabonan, eta abenduaren 15ean bukatu, Barakaldoko BECen. Guztira 14 saio izango dira, Euskal Herri osoan barrena. Bertso­zale elkarteak urtebete daramaki txapelketa prestatzen, eta irailaren 17an egingo dute aurkezpen ofiziala, eta irailaren 26an aurkezpen festa.

43 bertsolariak

-Maialen Lujanbio

-Iñaki Zelaia

-Unai Agirre

-Agin Rezola

-Beñat Gaztelumendi

-Aitor Mendiluze

-Jexux Mari Irazu

-Ainhoa Agirreazaldegi

-Aitor Sarriegi

-Alaia Martin

-Amaia Agirre

-Amets Arzallus

-Arkaitz Estiballes

-Beñat Lizaso

-Beñat Ugartetxea

-Eneko Fernandez

-Eneritz Zabaleta

-Erika Lagoma

-Etxahun Lekue

-Felix Zubia

-Fredi Paia

-Iban Urdangarin

-Igor Elortza

-Iker Zubeldia

-Iñigo `Mantxi´

-Iñaki Apalategi

-Iratxe Ibarra

-Jokin Uranga

-Jon Maia

-Jon Martin

-Jone Uria

-Julio Soto

-Maddi Sarasua

-Manex Agirre

-Miren Amuriza

-Nerea Elustondo

-Odei Barroso

-Oihana Bartra

-Oihane Perea

-Onintza Enbeita

-Sustrai Colina

-Unai Iturriaga

-Xabier Silveira