judoa probatu al duzu sekula? Hernaniko klubak ateak zabaldu ditu ekainean, ezagutu edo probatu nahi duten guztiek aukera izan dezaten. Astearte eta ostegunetan egingo dituzte entrenamenduak: alebinenek 19:00etatik 20:00etara; eta infantil mailatik gorakoek 20:00etatik 21:30etara. Probatu nahi duenak hitzordu horietara azaldu besterik ez du; ez da aldez aurretik izenik eman behar.
«Judoan ez dago alderik, neska eta mutilak konpetizio berdinetan aritzen dira»
Jone Irastorza arduradunak herritarrak gonbidatu nahi ditu kirol hau probatzera, bereziki neskak, eta gogoratu nahi die, judoak erabat berdintasunean egiten duela lana: «ez dago alderik, kirol parekatua da. Neska eta mutilak konpetizio berean aritzen dira, sari berdinak dituzte...» Aurten 115 judoka aritu dira Hernaniko klubean; 52 neska eta 63 mutil: «neskak normalean gutxiago animatzen dira judoa probatzera, baina Hernaniren kasuan, egoera oso ona da, ia erdiak baitira neskak».
Urte bikaina
Emaitzei dagokienean, denboraldi bikaina izan da pasa berri dena. Infantil mailan, neskak, Gipuzkoako txapeldunak izan dira taldeka. Maila berean, banaka, lau domina lortu dituzte: Maialen Iribarrenek urrea, Nagore Eizagirre eta Aroa Ferreirok zilarra eta Zuriñe Urdangarinek brontzea. Euskadiko Txapelketa ere jokatu dute aurten infantilek, eta Nagore Izagirrek eta Ana Ferreirok zilarra lortu dute, eta Maialen Iribarrenek brontzea.
Alebin mailan, eskolarteko konpetizio txiki moduko bat egin dute aurten Gipuzkoa mailan, eta Hernaniko neskak ere bikain aritu dira: txapeldun eta hirugarren geratu dira, taldeka. Maila berean, banaka ere, jantzi dituzte dominak: urrea Nerea Yungak (Inmakulada), zilarra Ainara Eizagirrek, Intza Etxeberriak eta Eneka Iribarrenek (Langile), eta brontzea Gaizka Romok.