Koadrilen eguna izaten da hernaniarrentzat San Joanetako inportantenetakoa. Ekainaren 25ean eguerditik hasten da festa Hernanin; eta abiapuntua berdina izaten dute guztiek: brindisa. Datozenetan Hernaniko koadrila historiko batek egingo du, Edan eta lo koadrilak. Orain 35 urte inguru elkartu ziren aurreneko aldiz, San Joan jaietan. Aurten, beraien eta besteen koadrilak elkartuko dituzte 12:00etan Plazan, elkarrekin brindisa egin, eta festari hasiera emateko.
Koadrila, betidanik
Koadrilari Edan eta lo izena 1978ko San Joanetan jarri bazioten ere, laguntaldean aurretik elkartzen ziren. Aste Santu inguruan geratu omen ziren aurreneko aldiz koadrila gisa, eta ordutik, edozein plan egiten zuten elkarrekin: Hernaniko kaleetan barrena paseatu, Tilosetara joan, lagunartean meriendatu... Eta koadrila gehienek bezala, inguruko festetara elkarrekin joan: Goizueta, Arano, Leitza, Lesaka, Andoain, Tolosa, Ergobia, Astigarraga, Portu eta Pasaia ziren, San Joanez gain, urteko zita garrantzitsuenak.
Bidaiak eta eskurtsioak ere, antolatu izan dituzte urte guzti hauetan, hala nola, Logroñoko cortijora, Ziordiara, Candanchura, Burgosera, Etxarri Aranatzera... Bazkari, afaria, gosari... otorduak izaten dira koadrilen puntu fuertea Euskal Herrian, eta hauek badituzte urtean, huts egiterik ez duten horietakoak: Koadrila Egunekoa, San Inaziotakoa, Baztanekoa eta Intxaurrondon egiten dutena. Eta berezienen artean, aipatzekoak: katu-jana, zakur-jana eta asto-jana!
Oroitzapenean, falta direnak
Brindis egunean gogoan izango dituzte hildako lagunak: «Tito, Jokin eta Luis, urte hauetan hainbat momentu eder pasa ditugu elkarrekin, eta gure oroimenean egongo zarete, beti».