«Karrera egunean disfrutatu egiten dugu, han egotea, kotxean sentitzen den tentsioa, motorraren hotsa... sentsazio hori ezin da beste ezerkin konparatu» hitz horiekin deskribatzen dute Rally edo Igoeretan sentitzen dutena Xemark Iriondok eta Mikel Marinek. Hernaniarrak dira biak, mundu honetan hasiberriak. Ilusioa dute barra-barra, eta hala transmititzen dute, ematen duten azalpen bakoitzean.
Ikusle izatetik partehartzaile izatera
Pasioa dute bi hernaniar hauek motorra duen edozein ibilgailurekiko. Ez da denbora asko Rally munduan hasi zirela; Xemark Iriondok bigarren urtea du aurten; eta Mikel Marinek aurrenekoa. Igoeretan, bakarka aritzen dira, bakoitza bere kotxean. Eta rallyetan elkarrekin, Xemark gidari eta Mikel kopiloto. Elkarrekin joaten ziren Rallyak ikustera, eta ikusle izatetik partehartzaile izatera iritsi nahi zuten biek: «guk ere noizbait atera beharko diagu esaten genion elkarri. Korritzen duen jendearekin hitz egiten genuen, kostua, kotxea prestatu... hasi aurretik eman beharreko pauso guztiak ondo aztertu genituen, eta animatu egin ginen».
Zein baldintza bete behar ditu kotxeak karreretan
ateratzeko?
Mikel Marinek kalerako ibiltzen zuen Golf markako kotxea tuneatu zuen karreretarako; Xemark Irondok, BMW 325i kotxea. Kotxe modeloa baino inportanteagoa, hasiera batean behintzat, federazioak eskatzen dituen baldintzak betetzea zen. Horretarako, hainbat aldaketa egin behar izan zituzten: «kotxea ez bolkatzeko barra bat jarri behar izan genuen lehendabizi. Eserleku bereziak ere exijitzen dituzte, zinturoiaren partez, arnesak, kortakorrientes bat... guztia egokitu behar izan genuen baimena izateko».
Norberaren eskulana,
ezinbestekoa
Aldaketa guzti horiek kostu ekonomiko bat dakarte, bai pieza aldetik, eta baita eskulan aldetik ere. Bi hernaniarrek bazekiten guztiari aurre egitea ezinezkoa izango zela eta, beraien eskulana ezinbestekoa zela, batez ere, hasieran: «guk moldatu dugu kotxe guztia, ez gara mekanikoak baina afizioa eta gogoa baduzu, edozer egin dezakezu. Laguntza eskatzen jakitea ere inportantea da, eta guk izan dugu. Hernaniko pare bat taller eta karrozerien laguntza izan dugu, Portuko San Joan Txiki, Goberacing eta Iglesias Sport esaterako.
Igoeretan bakarrik,
Rallyetan elkarrekin
Igoeretan edo Rallyetan parte hartzeko Euskadiko Automobilisimo Federazioan izena emanda egotea ezinbestekoa da. Baldintza hori beteta, igoera bakoitzaren aurretik izena ematea nahikoa da, lasterketetan parte hartzeko. Igoera edo Rallyak Euskadiko Federazioak antolatzen ditu eta egutegi bat izaten da izena emateko.
Igoeretan pilotoak bakarrik har dezake parte; hau da, bakoitza bere kotxean. Rallyak baino motzagoak izaten dira, 4-6 kilometro ingurukoak: «sinpleagoak direla esan liteke. Karreterak asfaltuta egoten dira, zabalagoak izaten dira, bi karrilekoak; garbi garbiak izaten dira».
Rallyen edo rally sprinten kasuan ibilbidea luzeagoa izaten da, 8-14 kilometro ingurukoa. Eta bidea ere, okerragoa izaten da: «tramo zabal bat segituan bihurtzen da estu, eta alderantziz... Karril bakarreko bideak izaten dira, asfaltatuak gutxitan... normalean grabilla eta lokatza izaten da nagusi, mendiko ibilbideak izaten baitira, exigenteagoak. Guk ordea nahiago dugu, orduan eta bide traketsagoa, zikinagoa, kurba itxiagoarekin, hobe... orduan eta gehiago disfrutatzen dugu».
Aurretik ibilbidea
ezagutzera
Rallyen aurretik ibilbidea ezagutzera joaten dira bi pilotoak. Xemarkek piloto lanak egiten ditu eta Mikelek kopiloto lana. Ibilbidea identifikatzera joaten direnean, kopilotoak apunteak behar bezala hartzea ezinbestekoa dela diote biek, baldin eta karrera txukuna egin nahi badute: «Mikelek koadernoan hartzen ditu notak, kurbak nolakoak diren, zein diren zailtasunak, non azeleratu litekeen... apunte bakoitzak du garrantzia, eta guztia ondo eskematizatzeak ere bai. Karreran murgilduta zaudenean ez da askorako denborarik izaten, eta kopilotoaren lan azkarrak markatzen du diferentzia».
Lasterketak eta gero,
kotxeei errepasoa
Karrera bukatuta, kotxea errebisatu behar izaten da, hurrengo lasterketari begira: «erruedak begiratu, olioa, radiadoreko ura eta nibela... hori ondo badago, hurrengo karrerarako prest gara. Kotxe hauek batallakoak izaten dira, ez dute arazo askorik ematen».