greba Orokorra deitu zuten atzo ELA, LAB, ESK, STEE-EILAS, EHNE, HIRU eta CNT sindikatuek eta Euskal Herriko eragile sozial ugarik. Batetik, eskatu zuten Rajoyk inposatutako murrizketak ez aplikatzea eta euren politikak errotik aldatzea; eta bestetik, eredu berri bat eraikitzea, eskubide sozial eta laboralen errespetuan eta justizia sozialean oinarrituko dena. Hernanin askok egin zuten bat Greba deialdiarekin. Komertzio txikiak, tailerrak... erdigunea guztiz itxita egon zen egun osoan. Industriaguneetan enpresa txiki eta haundi askok egin zuten bat Grebarekin, besteak beste, Orona, Loire, Sete, Teklan, Kamox, Garbitania, Urduri, Mitxelena eta Arkemak. Beste enpresa askotan ordea lan mugimendua nabari zen, aurreko Grebetan baino gehiago. Sindikatuen esanetan, Garayar enpresa gelditu egin zen, eta autobus gorriak normal egin zuen lan. Erakunde publikoei dagokienean, Udaleko langileek bat egin zuten Grebarekin, eta ondorioz, udaletxea, kiroldegia, udal liburutegia... itxita egon ziren egun osoan.
1.500 lagun inguru, Hernaniko manifestazioan
Jendetza bildu zen atzo arratsaldean Hernaniko manifestazioan. 1.500 lagun inguru elkartu ziren murrizketen kontra eta eskubide sozial eta laboralen alde. Sindikatuak oso gustura ziren erantzunarekin, eta Grebak izandako jarraipenarekin: «Hernaniar gehienek bat egin dute grebarekin, eta manifestazioak jendetza bildu du. Herritarrei dei egin nahi diegu, borrokak jarraipena izan dezan bihar».
Sindikatuak: «jarraipena %70ekoa izan da»
Sindikatuek Euskal Herri mailan egindako balorazioaren arabera, jarraipena erabatekoa izan zen, %70 baino gehiagokoa. Probintziak kontuan izanda, jarraipen haundiena Gipuzkoan izan zela azaldu zuten; atzetik, Bizkaia eta Araba.
Eusko Jaurlaritza:
«%18 sektore pribatuan
eta %20 publikoan»
Eusko Jaurlaritzak emandako datuen arabera, Grebak %18ko jarraipena izan zuen sektore pribatuan eta %20koa sektore publikoan. Probintziari dagokionean, jarraipen haundiena Gipuzkoan izan zela azaldu zuten.