Eskola Agenda 21 programaren barruan, Hernaniko ikastetxeetako haurrek Biodibertsitatea landu dute oraingoan. Hain zuzen, aniztasun kulturala aztertu dute. Bertatik, hainbat ondorio atera dituzte eta egoera hobetzeko hainbat proposamen landu dituzte.
Ohi bezala, proposamen eta eskaera horiek udal ordezkariei jakinaraziko dizkiete eta hori gaur izango da. Goizeko 09:30etan dute hitzordua udaletxeko Pleno Aretoan. Ikasleen ordezkariek, egindako eskaeren dokumentua aurkeztuko dute eta udal ordezkariek erantzunak emango dituzte.
Ikasleen foroa, apirilean
Gaia landu eta aztertzeko, ikasleek ekintza ugari egin dituzte: batzuk ikastetxe barruan, ikasleen jokaera eta ikastetxeko funtzionamendua hobetzeko; eta beste batzuk ikastetxetik kanpora, herria hobeto ezagutzeko. Ekintza horietatik ondorio batzuk atera dituzte eta konpromiso batzuk hartu. Guztia ondo biltzeko, txosten bateratu bat egin dute. Hori apirilaren 24an egin zuten ikasleen arteko foroan. Txosten bateratu hori da gaur udal ordezkariei aurkeztuko dietena.
Horrez gain, foro horretan sortutako lana erakusgai dago Biterin. Ostiralera arte dago ikusteko aukera.
9 urtetan, hainbat gai
Badira 9 urte Eskola Agenda 21 martxan dagoela Hernaniko Lehen Hezkuntzako ikastetxeetan eta urte hauetan gai ezberdinak landu dituzte: hondakinak, kontsumoa, mugikortasuna, ura eta biodibertsitatea.