Musika protagonista gaur Hernanin, eta bi musika eskoletako ikasleak oholtza gainean. Hernaniko saxofoi eta soka taldeak joko du gaur, 18:30etan, Biterin, eta Usurbilgo Zumarte eskolakoak ariko dira ondoren. Elkartrukea deitu diote, hernaniarrak martxoan izan baitziren Usurbilen.
16 abesti egitarauean
Ordu eta gehixeagoko kontzertua eskainiko dute Biterin, musika ikasleek, eta 16 abesti dauzkate prestatuta horretarako. Txandan ariko dira. Saxofonistek joko dituzte: Rocky eta Hawaii 5-0 abestiak. Soka taldeak, La Paloma, Vienan, eta O Sole Mio. Usurbildarren txanda izango da gero, eta 11 kanta prest: Maketume, Corroeig, Zenbat min, Iluntzean, Egina, Hitz margotuak, It’s my live, Badira hiru aste, Musika dantzan, Urrun izan arren, eta Behin batian Loiolan.
Gitarra, biolina, flauta, trikitia, panderoa eta abar ekarriko dituzte usurbildarrek, eta baita folk taldea eta talde instrumentala ere.
Igandean txistulariak
Musika Eskola publikoak du protagonismoa igandean ere. Txistulariek 9 kanta joko dituzte, eguerdiko 12:30etatik aurrera, Patxi Apezetxeak moldatutako Leoka kantuarekin hasi, eta Iñaki Egurenen Txobitorekin bukatu. Txistulariak: Eli Ansorena, Idoia Ansorena, Jon Ansorena, Ander Arandia, Patri Arozena, Nahia Etxeberria, Haritz Ezeiza, Aitziber Garin, Leire Goñi, Eider Oruezabala, Eduardo Lizarraga eta Iñaki Eguren.
Ikasleen matrikulazioa
Musika Eskolan aurrematrikula egiteko epea maiatzaren 27an irekiko da, eta maiatzaren 31n itxi. Ordutegia:
12:30-14:30 eta 15:30-20:00.