Floridako AMRko lurrak 28 miloian erosi zituen Etorlur enpresak, eta gaur egun 9-12 miloi artean balio dute, Gipuzkoako Foru Aldundiak salatu duenez. Diputazioak dio, operazio bakarrean 16 miloi euro galdu direla, bere garaian tasatu gabe erosi zirelako lur horiek, eta finantzaketa bideak aztertu gabe. Diputazioak dioenez, Etorlur enpresa publikoa egoera oso larrian dago, sekulako dirutzak galdu omen dituelako Gipuzkoan egindako hainbat operaziotan. Floridako AMRkoaz gain, Orbegozoren bulegoak berritzea ere sartzen dute tartean. Guztira, 20 miloi euroko galerak omen ditu Etorlurrek, eta likidatzeko puntuan omen dago. Kontuak berriz formulatuko ditu Diputazioak, eta erremedio bat bilatzen saiatuko da, Iñaki Errazkinek adierazi duenez. Errazkin da Ingurumeneko eta Lurralde Antolaketako diputatua, eta Etorlurreko lehendakaria.
2006an sinatutako operazioa
Floridako AMRko lurrak 2006an eskuratu zituen Etorlurrek, eta guztira 28 miloi euro ordaindu zizkion AMR enpresari. Hiru partek sinatu zuten hitzarmena: Etorlurrek, Hernaniko Udalak eta AMRk. Ondorioz, AMR enpresa lekuz aldatuko zen, Ibaiondo poligonoko partzela batera, eta gutxienez 10 urtean Hernanin jarraitzeko konpromisoa hartu zuen. Etorlurrek AMRri erosi zizkion Floridako lurrak, etorkizunean 300 etxebizitza egiteko asmoarekin. Ordainketa horrela egin zen: 5 miloi euro inguru espeziatan, alegia, Ibaiondoko partzela hori AMRri emanda; eta gainerako 23 miloi euroak dirutan.
Diputazioaren txostenak dioenez, garai hartan ez ziren tasatu Floridako lurrak, eta ez zen kalkulatu finantziaketa nondik eta nola lortuko zen.
Gaur egun, lur horiek tasatu dituzte bi enpresek: batek dioenez 9 miloi euro balio dute, eta besteak dioenez 12 miloi euro. Berez, kasurik onenean, 16 miloi euro galdu direla dio Diputazioak.
Horrez gain, Diputazioak bere txostenean adierazten du Hernaniko Floridako hirigintza eragiketa ezin izan dela egin, eta ez du zehaztu aurrerago zein den asmoa, edo zer erabakiko duen lur horiekin.
Orbegozoko bulegoetan
3 miloi euroko galera
Urte haietan, baita ere, Etorlurrek Orbegozoren bulegoen edifizio zaharra berritu egin zuen, Ibaiondo industrialdean. Edifizio horrek bost pixu ditu eta garajeak. Guztira 3.650 m2. Proiektuan aurreikusten zen, beheko pisua kafetegi eta jatetxe moduan jartzea, eta baita lokal komertzial bat jartzea ere. Goiko solairuetan bulegoak jarri ziren. Sotoan, garajeak. Diputazioak dioenez, oraindik bulego bakarra saldu du Etorlurrek, eta beste bi eman ditu alkilerrean. Guztira, 3 miloi euroko galera dela dio Diputazioak, beste lokalik saltzerik lortzen ez den bitartean.
Etorlur, desegiteko zorian
Etorlur enpresa Diputazioarena da %100ean, beraz enpresa publiko bat da. Helburua: Gipuzkoako lurrak gestionatzea, batez ere azpiegitura industrial eta babestutako etxebizitzak sortzeko.
Diputazioak dio, Etorlur desagertzeko zorian dela, pilatu dituen zorrak bere kapital sozialaren %50era iristeko zorian direlako, eta kasu horretan enpresa likidatu egin beharko litzatekeelako. Hori ez gertatzeko, Diputazioa konponbide bat bilatzen saiatuko da, «operazio espekulatzaileetan sartu gabe».