Begoña Bitorika: «LOMCE legearekin atzera egingo ditugu urte asko eta asko»

Hezkuntza zentruetan se­kulako mugimendua sortu du LOMCE legeak, edo Wert Legea gisan ezagutzen de­nak. Jose Ignacio Wert Es­pai­niako Hezkuntza Ministroak aurkeztu zuenetik, hainbat protesta egin dira lege ho­rren kontra, baita Hernanin ere. Espainiako Parlamen­tuak da­tozen hilabeteetan onartu le­zake legea, «aspaldiko atzerapauso haundiena eragingo duena», Begoña Bi­torikak dioenez, Sortzen Ikas­batuaz elkarteko kideak.

Hitzaldia izango da bihar, 19:00etatik aurrera, Udale­txe­ko Areto Nagusian. Anto­latzaileak: Sortzen Ikasbatu­az, EIGE, Sarean, eta BIHE hezkuntza elkarteak, eta LAB, ELA eta STEE sindikatuak.

Azterketa kontrolatuak
Begoña Bitorikak dioenez LOMCEk aitzakia gisa erabili du Europako Pisa txostena, eta hor oinarrituta Espainia osoan hezkuntza lege bera aplikatu nahi du. «Hiru zutabe nagusi jarriko dira: matematika, zientzia, eta irakurmena. Azterketa horiek be­raiek bidaliko dituzte, eta denek prestatu beharko dute horretarako». Bitorikak dioenez, ordea, ez da hori txarrena, baizik eta ze hezkuntza eredu bultzatu nahi den. «Ikasleak eta ikastetxeak se­lekzionatu egin nahi dira. Ikasle txarrak eta onak, lehenbailehen bereiziaz. Bikain­ta­suna sarituko da. Ez duzula balio nik esandakoa ikasteko? Lanera. 14-15 urterekin lan mundura bideratu nahi dira ikasle txar horiek. Emaitzen arabera, ikastetxeekin ranking bat egingo dute. Onenak saritu egingo dira, eta baliabide gehiago eman».

Erlijioa eta hizkuntza
Bitorikak dioenez, erlijioa be­rriz bueltatuko da ikaste­txeetara, eta D eredua dudan dago. «Katalunian gertatu be­zala, haurra A ereduan matrikulatu nahi duenak eskubidea du hori egiteko, herrian A eredurik eskaintzen ez bada ere. Horregatik, ikastetxeak eman egin beharko dio. Erlijioa katolikoa izango da, eta hautazko bezala hartu ahal izango da, eta ikastetxea behartua dago eskaintzera».

Horrez gain, LOMCE legeak botere haundiagoa emango dio zuzendariari, Bitorikak dioenez, eta Eskola Kontsei­luari erabakia kenduko dio.

«Denoi eragingo digu»
Katalunia eta Galiziako ikastetxeekin protestak bateratzen ari dira euskal ikastetxeak, eta gizarteari eskatu diote lagun­tzeko borroka horretan. «Ikas­le kritikoak ez dira bilatzen, baizik eta eurek esandakoa ondo ikasiko duten ikasleak. Hori oso txarra da gizartearentzat, eta denok nozituko dugu etorkizunean».