musika Eskola berria martxan jarri, eta berehala izan zen Hernanin Txalaparta ikasteko aukera. Hogeita zazpi urte pasa dira ordutik, eta Musika Eskolak lanean jarraitzen du, soinu-tresna hau eskola barruan eta kanpoan zabaltzeko. Hori horrela, klaseez gain, joaldiak antolatzen dituzte tarteka Hernani eta inguruko herrietan. Eta urtean behin, Txalaparta Topaketa. 27garren edizioa izango da aurtengoa, eta gaurtik larunbatera, egunero izango dira ekintzak: hitzaldiak, emanaldi bereziak, Hernani eta inguruko herrietako txalapartarien topaketa....
Txalaparta, mugak pasa dituen soinu tresna
Daniel Garcia de la Cuesta asturiarrak hitzaldia emango du gaur Biterin. Ikerketa egin du, Asturiaseko monastegi batean tabla tañidari buruz aurkitutako 200 dokumentu ingururekin. X eta XIIIgarren mende bitartekoak dira dokumentu horiek, eta bertan azaltzen da, besteak beste, instrumentu honek izan zuen zabalkundea. Kutsu erlijioso eta filosofikoko ospakizunetan entzuten omen zen asko txalaparta, eta Mediterraneo itsasotik, Europara eta Txinara ere, heldu omen zen instrumentua.
Sagar Mekanikoa eta Txalaparta party aparta, bihar
Txalaparta jotzeko erabiltzen den materialaren eboluzioa eta berrikuntza etengabea da. Biharko Sagar Mekanikoa emanaldian pausu bat gehiago emango dute bide horretan, eta elektronika eta txalaparta uztartuko dituzte. Emanaldia, 19:30etan, Biterin. Eta gauerdian, tradizioa bihurtu den Txalaparta party aparta antolatu dute, Atxur tabernan.
Festa, larunbatean
Egun haundia larunbatekoa izango da. 12:00etan erromerian ibiliko dira Musika Eskolako alboka, dultzaina, trikitixa eta txistu taldeak lagunduta. Ondoren, bazkaria antolatu dute; txartelak aldez aurretik erosi behar dira, 20 euroan. Eta arratsaldeko 17:00etan hasiko da jaialdi nagusia: bertsolariak izango dira batetik; eta Hernani eta beste hainbat txokoetatik etorritako txalapartariak, bestetik. Merkatu txiki bat ere jarriko dute.