Hernaniarrek partidu garrantzitsua zeukaten atzo Real Unionen aurka eta 1-2 galdu zuten. Txuri-berdeek bigarren postuan jarraitzen dute oraindik, baina irundarrak 2 puntura dauzkate. Liga bukatzeko bi partidu geratzen dira eta Hernaniren helburua bigarren postuari eustea da, Hirugarren mailara igotzeko bidean, play offa jokatzeko. Lehenengo postuak eta zuzeneko igoerak ihes egin dio dagoeneko, Oiartzunek atzo irabazi egin baitzuen. Txuri-berdeak galtzen hasi ziren atzo eta lehenengo zatia hala bukatu zen: 0-1. Bigarren zatian berdintzea lortu zuten Zabaletaren golari esker, baina partidua bukatzeko 15 minutu falta zirenean irundarren gola iritsi zen.
Athletic Zubipen gaur, aurreneko aldiz
Emakumezkoen Ligako taldeak Euskal Herriko Kopa txapelketari ekingo dio gaur. Athletic izango du aurkari, historian aurreneko aldiz Zubipera etorriko den taldea. Partidu gogorra espero dute hernaniarrek, nesken Bigarren Mailan, goiko postuetan ibiltzen den taldea baita bizkaitarra. Txapelketako final zortzirenetako partidua izango da gaurkoa; eta bueltako partidua datorren asteburuan jokatuko da Lezaman. Norgehiagoka, 16:30etatik aurrera.
Erregional 1go mailako taldeak, igoera jokoan
Erregional 1go mailako taldeak Gorengo mailara igotzeko aukera du gaur. Horretarako, Gure Txokoaren kontra irabazi edo berdindu egin beharko du. Herritarrei dei egiten diete Zubipera gerturatzeko, 18:30etan.