Hernaniko Elkartasun Astea atzo bukatu zen Elkartasun Egunarekin. Ekintza ezberdinak izan ziren preso eta iheslarien eskubideak aldarrikatzeko eta eguerdian, giza-katea egin zuten herritar ugarik. Atsegindegitik abiatu eta Plaza Berrin bukatu zuten herriko auzo ezberdinetatik barrena ibili ostean.
Plaza Berrin Herrirako kideek hartu zuten hitza eta herritarrei dei egin zieten guztiek eskutik heldu eta aurrera egiteko. «Guztion esku dago. Guztion eskuak beharrezkoak dira, preso eta iheslarien eskubideen aldeko lanean. Estatuen inmobilismoaren aurrean, bideak zabaltzeko garaia da giza eskubideen, konponbidearen eta bakearen alde».
Krossa eta bazkaria
Urtero bezala, krossa eta bazkaria egin ziren atzo. Krossean, beste urtetan adinako parte hartzea ez izan arren, giro ederra izan zen nagusi. Bazkaltzen, 200 lagun elkartu ziren Tilosetan, eguraldia lagun. Ondoren, ohi bezala, enkantea egin zen.
Maiatzak 18, ‘Plazak bete’
Datorren larunbatean, ekimen ezberdinak izango dira Euskal Herri osoan, Plazak bete lemapean. Hernanin, kafe-tertulia, 12:00etan Plazan.