Udal Gobernuak asteartean, Atez Atekoari buruz egindako balorazioaren harira, PSE-EE alderdiak kritikatu du Gobernu taldeak prepotentziaz jokatu duela eta gezurra esan diela hernaniarrei: «Ez da egia 5garren edukiontzia garestiagoa dela. Alkateak berari komeni zaion moduan erabili ditu datuak». Sozialistek azaldu dutenez, abenduko Plenoan Udal Gobernuak taula bat eman zien bi sistemak konparatuz eta datu horietan oinarrituta, honakoa azpimarratu dute: «Beti ere, datu horiek ontzat emanda, bosgarren edukiontziarekin egindako bilketa garbiagoa eta erosogoa izatez gain, 264.594 euro merkeagoa litzateke».
Birziklatzeagatik, sarrerak
Taulari erreferentzia eginez, sozialistek diote Atez Atekoarekin kontuan hartzen direla birziklatzeagatik jasotzen diren diru sarrerak, baina bosgarren edukiontziari dagokionean, diru sarrerak 0 euro direla jartzen duela. «Zergatik ez dira diru sarrera horiek kontuan hartzen? Kontuan hartuta, bosgarren kontenedorearekin diru gutxiago galtzen da».
Bilduk tranpa egiten duela ere gaineratu dute, bosgarren edukiontziari erraustegiaren kostua gehituta. «Atez Atekoarekin ere errefusa sortzen da, zer egiteko asmoa daukate horrekin? Eta martxan jartzeko asmoa duten organikoa tratatzeko planta horien kostua, Atez Atekoaren gastu bezala sartuko al dute?».
Legazpiko kontsultari buruz eta Hernanin bildutako 6.000 sinaduren inguruko balorazioa ere egiteko eskatzen diote Gobernu Taldeari.