Gipuzkoako Eskolarteko Bertsolari Txapelketa abian jarri zen joan den ostiralean. Hernanin jokatu zen lehenengo kanporaketa, eskualde mailakoa, eta hernaniarrak txukun aritu ziren. Haundien mailan (14-18 urte), Eli Pagolak eta Eñaut Martikorenak hartu zuten parte eta maila altua erakutsi zuten. Beste sei bertsolarirekin lehiatu ziren eta guztiek oso saio ona egin zuten.
Txikien mailan ere, txukun
Txikien mailan (14 urte arte), bi taldek neurtu zituzten indarrak: Hernani-Oiartzungo taldeak (Jon Aizpurua, Etxahun Arrue, Urtzi Nazabal eta Amaiur Oskila) eta Oiartzungo taldeak (Xuban Martiarena, Jokin Irastortza, Josu Ibarguren eta Aiora Mantxeño). Txukun aritu ziren bi taldeak.
Finala, maiatzaren 31n
Datozen asteetan, hurrengo hiru kanporaketa jokatuko dira, eskualde mailakoak: Zarautzen, Arrasaten eta Lazkaon. Kanporaketak gainditzen dituzten bertsolariak finalera pasako dira. Finala Tolosako Leidor aretoan izango da.