Pelotako txapelketarik garrantzitsuenetakoa da GRAVN Torneoa (Gipuzkoa, Errioxa, Araba, Bizkaia eta Nafarroak hartzen dute parte) eta Hernaniko 8 pelotarik jokatu dituzte finalak, asteburuan, Gipuzkoako taldearekin. Bakoitza bere modalitatean aritu da: eskuz, palan eta erremontean. Denera, 5 txapela lortu dituzte.
Palan, seitik lau
Palan, sei hernaniarrek jokatu dituzte finalak eta lau txapela lortu dituzte. Trinketean, jubenil mailan, Huizi eta Arrietak 30-7 irabazi zioten Bizkaiari. Sub22an, Pagolak Aburuzarekin jokatu zuen eta 30-16 irabazi zioten Arabari. Ezker horman, Sub22an, Irazustabarrenak Mendizabalekin jokatu zuen eta 30-28 irabazi zioten Arabari. Jubeniletan, berriz, Goikoetxea eta Senperrek 25-30 galdu zuten Bizkaiaren aurka.
Erremontean ere bai
Erremontean ere, Sub22an, txapela jantzi du hernaniar batek: Jon Ander Elorzak. Larrañagarekin jokatu zuen eta 40-9 irabazi zioten Nafarroari.
Huizik, bi txapela
Asteburuan, trinketeko Gipuzkoako finalak ere jokatu zituzten palan eta 2garren mailan, Huizik eta Senperrek 30-21 irabazi zien Suberriri. Aurreneko mailan, Irazustabarrenak eta Manzisidorrek 19-30 galdu zuten Suberriren aurka.
Tanto bategatik, txapela Errioxara
Final gogorra eta peloteo askokoa izan zen. Arrietak jokatzen zuen hirugarren finala zen.
Ioritz Arrieta pelotari hernaniarrak ezin izan zuen denboraldiko txapelketa garrantzitsuena irabazi. Albisturgo Xabier Telletxea lagun zuela, 22-21 galdu zuten Victor-Matute III bikote errioxarraren aurka.
Partidu gogorra eta peloteo askokoa izan zen, 75 minutu ingurukoa. Gipuzkoarrak aurretik izan ziren 15na berdindu zuten arte. Handik aurrera oso parekatua joan zen lehia eta 21na berdindu zuten. Telletxearen hutsegite batek errioxarrei eman zien garaipena. Arrietak eta aurrelari errioxarrak oso ondo jokatu zuten, baina atzean erabaki zen partidua.
Hiru final
Arrietak hiru final jokatu ditu azken honekin; pelotari gutxik esan dezakete hori. Lehenengo aldiz, jubeniletan jokatu zuen Arzelusekin eta irabazi egin zioten Nafarroari. Bigarren txandan, Sub22an jokatu zuen Bolinagarekin eta kasu honetan galdu egin zuten Nafarroaren aurka.
Benjaminek arratsalde pasa ederra egin zuten Astigarragan
Larunbat arratsaldean Benjaminen pala topaketa egin zen Astigarragan, Emakumea Pilotari ekimenaren bidez. Bertan, Hernani, Astigarraga, Aia, Bidania eta Zestoako gaztetxoak elkartu ziren. Palan jolastuz, arratsalde pasa ederra egin zuten. Zortzi hernaniarrek hartu zuten parte.