LAB sindikatua: «Lana banatu, ondasuna banatu!»

Aspaldiko jendetza haundiena bildu zen atzo Herna­nin, LAB sindikatuak deituta, maiatzaren 1eko aldarrikapenekin bat eginez. Oihu bat nagusitu zen denen artean: «lana banatu, ondasuna banatu»; baina izan ziren gehiago ere: «gazte bat, lanpostu bat», edo «emakume bat, lanpostu bat». Euskal presoen aldeko oihuak ere izan ziren eta baita independentziaren aldekoak ere.

Ibilbide luzea
Buruntzaldea eta Tolo­sal­deako langileek elkar hartuta egin zuten atzoko Her­na­niko manifestazioa. Ibilbide luzea egin zuten, eta hainbesteko jendetza zen, mo­men­tu batean ia gurutzatu egin zirela manifestazio bu­rua eta bukaera;  La­rramendi eta Elkano kaleen bideguru­tzean, hain zuzen ere.

6 urtean 2.000 langabetu gehiago Buruntzaldean
Tiloseta bete-betean zela ekitaldia egin zuten. LABeko kideek hitz egin zuten, eta baita Sortu eta Ernaiko kideek ere. Denek azpimarratu zuten egoera ekonomiko larria bizi dugula. «Krisi finantzieroa hasi zenetik 6 urte pasa dira, eta zulo gero eta beltzagoan sartzen gaituzte Euskal Herrian egiten ari diren politikek... Bu­runtzaldean 2.000 langabetu gehiago daude, eta Tolo­sal­dean 1.500 gehiago».
Emakumeek %24 gutxiago kobratzen dute orokorrean, EAEn, eta gazteek oztopo haundiak dituzte lanean hasteko. Hori azpimarratu eta  salatu zuten talde guztiek. «Horregatik, dei egiten du­gu, maiatzaren 30ean egingo den Greba Orokorrera».