Gozatzera eta ligari agur esatera aterako da Hernani gaur Landaren. Santboiana talde haundia izango dute aurrean, liga bigarren postuan bukatuko duen ekipoa. Hernanik ez du ezer jokoan, baina garaipenarekin bukatu nahi du denboraldia, eta bide horretan azken bultzada eman beharko dute jokalari, teknikari eta zaleek. Partidua Landaren jokatuko da, 12:30etatik aurrera.
Promozioa,
maiatzaren 12an eta 19an
Ohorezko mailari eusteko promozioa jokatu beharko du Hernanik datorren maiatzaren 12an eta 19an. Aurkaria ezezaguna da oraindik: Alcobendas edo Santanderreko Independienteren arteko finaletik aterako da. Galtzailea izango da Hernaniren kontrarioa.
Euskal Ligako irabazleei, kadete eta jubenilei, omenaldia
Klubarentzat egun haundia izango da gaurkoa, 20 eta 18 urtez azpiko jokalari eta teknikariek zaleen omenaldia eta txalo zaparrada jasoko baitute. Kadete eta jubenil taldeak Euskal Liga irabazi dute, eta ondo merezitako aitorpena jasoko dute gaurkoan.
Kadeteek atzo lortu zuten txapelketa irabaztea, Eibarri irabazi ostean, eta jubenilek orain bi aste. Orain Estatuko txapelketa dute aurretik. Klubak Kronikari azaldu dionez, lorpen hauek haundiak dira eta berebiziko garrantzia dute: «maila hauetan egiten ari den lan bikaina eta ona, biharko lanaren garantia izango da. Zorionak gazteak!»