denboraldi bikaina ari da egiten Hernani. Hasierako helburua ondo baino hobeto ari dira betetzen txuri berdeak: partiduz partidu joan, ahalik eta garaipen gehien lortuz. Azken txanpan da liga, eta bide bera mantenduta, badute beste helburu bat: Hirugarren mailara igotzea. Ez dute bide erraza, Oiartzun baita liderra, eta aurreneko sailkatua bakarrik igotzen da zuzenean. Hernanik bere bidea egin nahi du, hasteko, partiduak irabazi. Eta hori lortuta, Oiartzunek noiz galdu zain egon. Atzo jokatu zuten azken bost finaletako bat, Zubipen, Zarautzen kontra. Taldea indartsu sentitzen da, eta hori nabaritu zen 90 minutuetan; 4-0 irabazi zuten, partidu ederra jokatuta.
Konfiantzarekin
eta ilusioarekin
Sentsazio oso ona du taldeak zelairatzen denean; konfiantarekin dira, eta ilusioarekin, azken erronkaren aurrean. Badakite aurretik dituzten partiduak finalak direla, eta dena ematera atera ziren atzo. Lehenengo gola 6garren minutuan sartu zuen Goiak. Handik gutxira, Elberdinek beste bi sartu zituen; eta deskantsura, 3-0ko aldearekin iritsi ziren. Bigarren zatia lasaiagoa izan zen, partidua ia erabakita baitzegoen. Baina gol gosez dira hernaniarrak, eta emaitza borobiltzeko, 4-0koa sartu zuen Bereziartuak.
Lau partidu aurretik
Egin beharreko lanekin kunplituta, Tolosaren kontrako partiduan dute burua hernaniarrek; joko onarekin jarraitu, eta irabaztera atera. Oiartzunek 4-0 irabazi zuen atzo, eta aldea berdina da: 2 puntu.