Hernanin bertan aukera haundia daukate 16 urteko gazteek, ikasketei segida emateko. Derrigorrezko ikasketak aurten bukatuko dituzte. Horietatik batzuk lanean hasiko dira eta beste batzuk ikasten jarraituko dute. Azken horiek orain aukeratu behar dute ze ikasketa egin nahi dituzten. Batxilergoko aurrematrikula ostegunetik aurrera egin behar da, maiatzaren 14ra bitartean; horretarako, Hernani BHIk eskaintzen ditu bi aukera nagusiak: Giza eta gizarte zientziak; eta Zientziak eta teknologia. Lanbide Heziketa egin nahi dutenek hilabete bukaeran dute aurrematrikulazioa, eta Lanbide Hastapenekoek ekainaren 3an. Helduen Hezkuntzako (EPA) aurrematrikula berriz, irailean irekiko da.
Hernani BHIn
punta puntako eskaintza
Ez dago Hernanitik kanpora joan beharrik Batxilergoa edo Heziketa Zikloak egiteko. Hernani BHI Institutuak aukera haundia eskaintzen du, eta ikasketa gutxi batzuk kenduta, kurtso nagusiak Hernanin bertan egin litezke.
Batxilergoan hiru adarretatik bi, Hernani BHIn badira. Batetik, Giza eta gizarte zientziak: filosofia, hizkuntzak, gizarte, historia… heziketa filosofiko eta linguistikoak, sozialak eta historikoak, hain zuzen. Horrez gain, ikasleak prestatzen ditu unibertsitaterako edo Lanbide Heziketako prestakuntza zikloetarako. Bestetik, Zientziak eta teknologia, oinarrizko formazio zientifikoa: natur eta osasun zientzien alorreko diziplinetan funtsezkoak direnak.
Heziketa Zikloak ere eskaintzen ditu Hernani BHIk: goi mailakoak eta erdi mailakoak. Erdi mailakoetan hiru aukera badira: Mekanizazioa, Instalazio elektriko eta automatikoak, eta Mantenu elektromekanikoa. Goi mailakoetan ere beste hiru: Fabrikazio mekanikako diseinua, Sistema elektrotekniko eta automatizatuak, eta Animazio soziokulturala eta turistikoa.
Horrez gain, Hernani BHIk baditu bestelako aukerak ere. Hiru dira aipagarrienak: Hasierako Lanbide Prestakuntzako Programak (HLPP): batez ere erakusten da Mekanizazioko langile batek jakin beharreko oinarrizkoa. Bigarrena, Eskaintza partziala: hor erakusten dira Instalazio elektriko eta automatikoak. Azkenik, Sarbide Probak ere prestatzen dira Hernani BHIn: hain zuzen Goi mailako heziketa zikloetan sartzeko proba prestatzen erakusten dute.
Erizaintzako zikloa, Inmakuladan
Inmakulada ikastetxeak, urtero bezala, erdi mailako ziklo bat eskainiko du, Erizaintzari buruzkoa: zaintza osagarriak.
Badira ziklo gehiago ere Hernanin. Horietako bat Transpakarren emango dute: Ibilgailuak konpòntzeko langileak aterako dira ziklo horretatik.
Zortzi aukera
HHI-CEPAn (EPAn)
Helduek, edo ikasketak bukatu nahi dituztenek Antziola auzoko HHI-CEPAn aukera polita daukate. Zortzi aukera dituzte horretarako: Idazten eta irakurtzen ikasi; Zure ezagupenak gaurkotu; Komunikazio trebetasunak hobetu; Bigarren hezkuntzako graduatua lortu; Sarrera probetarako prestatzea bai Unibertsitatera eta baita goi mailako zikloetara ere; Informatika; Euskara, ingelesa, eta frantsesa; eta Gaztelania.
16 urteko 178 gazte
Hernaniko erroldaren arabera, Hernanin 178 gazte daude 1997an jaioak; beraz, gutxigorabehera horiek dira ze ikasketa egin erabaki behar dutenak. Gaur egun, Hernani BHIn 205 ikasle ari dira Batxilergoan, eta 120 ikasle Lanbide Heziketan.