antxoa kolpea izan zen asteartean Gipuzkoako kostaldean. Hondarribia, Getaria eta Pasaiako portuetako arrantzaleak bitan atera ziren garai honetan hain preziatua den arraiaren bila. 70.000 kilo antxoa inguru sartu ziren Gipuzkoan, eta atzo joera mantendu zen; arrantza itsasontzi bakoitzeko, 250 kaja inguru. Ohi baino beranduago sartu da antxoa aurten, negua ere, ohi baino luzeago izan baita. Eguraldi ona, epela eta itsaso barea behar izaten dira, eta azken egunek lagundu dute horretan.
Antxoa gosez, jendea
Garaian garaiko produktuak jatea komeni izaten dela badakite hernaniarrek, eta sasoi honetan, antxoa gosez izaten dira. Itxaspe arrandegiko arduradunak, Joxeanek dio, kolpea izaten denean, prezioa jaitsi egiten dela, eta hernaniarrak irrikaz egoten direla: «antxoa asko sartzen denean, prezioak behera egiten du dexente. Asteartean 9 euro inguruan erosi nuen lonjan, eta 12 euroan saldu. Antxoa sartu bezain laister erosi nuen, eta hortik prezioa. Gero, itsasontzi gehiago sartu, eta kolpea zela eta, merketu egin zen. Atzo, 9.90 euroan saldu genuen». Ugaritasuna noiz, zain egoten dira herritarrak, eta halako egunetan, antxoa asko saltzen da arrandegietan: «kolpea dagoenean, prezioa ona izaten da, eta egunean 60 eta 100 kilo antxoa bitartean saltzen ditugu». Hala ere dio, joera hori hasieran izaten dela: «joerak izaten dira, orain antxoa asko egoteak ez du esan nahi datorren astean asko egongo denik. Hala ere, jendeak hasierako kolpean izaten du irrika. Gero, nahiz eta prezioa mantendu, baretu egiten da herritarren nahia».
Kanpaina, martxotik ekainera
Antxoa kanpaina martxoan hasten da, eta ekainean bukatu; orduan izaten baita antxoa gehien Kantauri itsasoan. Hasiera politta izan zen aurtengoa, baina arrantzaleen esanetan, egun gutxiko kontua izan zen. Asteak pasa dituzte ia antxoarik arrantzatu gabe, eta asteartean, kolpea aprobetxatu zuten. 2 eta 6 ordu bitarteko distantzia egiten dute itsaso barrura antxoa arrantzatzeko, eta egun hauetan gehien, erdibidean aurkitu omen dute.
20.700 toneladako kopurua, arrantzatzeko
Kanpaina martxoan hasten bada ere, Europar Batasunak kuota edo arrantzatu daitekeen antxoa kopurua 2012ko uztailaren 1etik 2013ko ekainera finkatzen du. Aurten %30 gutxitu dute kopuru hori, eta guztira, 20.700 tona arrantzatu litezke Bizkaiako Golkoan; horietatik 16.630 Estatuak, eta gainerakoa Frantziak. Joan den urtean 6.700 tona antxoa arrantzatu ziren euskal portuetan eta Itxaspeko Joxanek dioenez, ez ziren EBk ezarritako kuotara iritsi..