«Krisi garai honetan, gure beharrak ase ahal izango ditugu diruz ordaindu gabe», azaldu dute Berrer@2 elkarteko kideek. Asmo horrekin, Hernanitruk Denbora Bankua jarri dute martxan. Bihar aurkeztuko dute Biteriko ikastaro gelan, arratsaldeko 19:00etan.
Denbora, denboraren truke; zerbitzua, zerbitzuaren truke
Hernanitrukek, elkartrukerako sare bat osatzea duela helburu azaldu dute: «Herritar guztientzat eta herritarrena den espazio bat izango da».
Denbora Bankuetan, zerbitzuak edo jarduerak trukatzen dira eta denbora edo orduak dira moneta bakarra; hau da, denbora, denboraren truke. Berrer@2 elkarteko kideek azaldu dute, beste lurraldeetan 70garren hamarkadatik martxan daudela iniziatiba komunitario hauek eta Euskal Herrian gero eta herri gehiago direla proiektu honen alde egiten dutenak.
«Egitasmo hauek herri bati izaera ematen diote eta Hernanin, elkarlanerako apustua egin behar dugu. Helduak, gazteak, emakumeak, gizonak, etorkinak... edonork du zer eskainia, baita zer eskatua ere», azpimarratu dute.