EGURALDI onak udako oporrak geroz eta gertugo daudela gogoratzen digu. Hernaniko Udalean lanean ari dira dagoeneko herriko txikienentzat udaleku irekiak prestatzen. Aurten ere, bi adin tartekoentzat antolatu dituzte, ume eta gazteentzat: txikienak, 3-10 urte bitartekoak izango dira; eta gazteak, 11-12 urtekoak.
Bi udalekuak uztailean
2003tik 2009ra jaiotako umeen udalekuak, hau da, txikienenak, uztailaren 1ean hasiko dira, eta 24ra arte luzatu. 2001-2002 urteetan jaiotakoenak aldiz, laburragoak izango dira, 8tik 19ra hain zuzen.
Izena emateko epea zabalik hilaren 24ra arte
Udalekuetan ondo pasa eta uztailean lagunartean egon nahi duten ume eta gaztetxoek izena eman behar dute aldez aurretik. Epea zabalik dago, eta Udaletik jakinarazi dutenez, asteazkenera arte egongo da aukera.
Gogoratu dute, herriko ikastetxeetan dabiltzan haurrek izena emateko orria ikastetxean bertan entregatu behar dutela. Gainontzekoek hiru aukera dituzte: goizez, 09:00etatik 13:00etara Udaleko euskera zerbitzutik pasata; 943 33 70 29 telefonora deituta; edo email bat bidalita euskara@hernani.net helbidera.
Matrikularen prezioa 94,70 eurokoa da, udaleku bakoitzerako.
500 haur eta 115 gazte,
joan den urtean
Aurten izena emango duten gazte asko errepikatzaileak izango dira; izan ere, joan den urtean 500 haurrek eta 115 gaztek hartu zuten parte Udalak antolatutako udaleku irekietan.
Txikienek tailerrak, ekitaldiak, irteerak, jolasak, zinea, kazetari lanak eta abar egin zituzten hilabete osoan zehar; eta nola ez, tradizioa diren ur festa, san ferminak, igerileku irekietara irteera...
Gaztetxoen udalekuek aldiz, lotura zuzena dute kirolekin, gazteek praktikatzea baita neurri haundi batean, helburua. Herri kirolak, mendi bueltak, errugbia, piraguan ibiltzea... txandatzen praktikatzen dituzte, era guztietako kirolak probatzeko asmoz.