Nondik dator banatzen den janari guztia?

INSTITUZIOEN, enpresa haun­dien eta txikien eta banakakoen laguntza ezinbestekoa da EBTren gisako taldeek funtziona dezaten. Kasu honetan, behartsuei janaria banatzeaz ardura­tzen da talde hernaniarra. Baina nondik dator janari hori guztia?

Europatik, urtean hirutan
Banatzen den janariaren zati haundi bat Europako Erki­de­gotik etortzen da. Lau hilabetero iristen da, urtean hirutan, eta epe luzera kadukatzen diren produktuak bidaltzen dituzte, batez ere: kontserbak, olioa, atuna, arroza, pasta... Azken bi hauek fijoak izaten dira, beti iristen diren horietakoak; besteak aldatu egiten dituzte, hiruhilekoaren arabera. 0-2 urte bitarteko umeen­tzat banatzen diren produktuak ere, Europako Er­ki­de­go­tik iristen dira, hala nola, esne hautsa, potitoak, zerealak...

Supermerkatu haundiek, jarrera positiboa
Supermerkatu haundien ja­rre­ra positiboa ere azpimarratu du Rodriguezek. Hauek, kadukatzear dauden produktuak ematen dituzte, yogurrak, esnea, enbutitua, gazta eta mantekilla esaterako. Fruta eta barazkien ka­suan, ukituak daudenak ema­ten dituzte. Horrez gain, supermerkatuetan bertan kanpainak egiten uzten dute, herritarrek nahi duten produktuak erosi eta eman ditzaten. Kanpaina hauetan ere, supermerkatuek janaria ema­ten dutela azaldu du Rodriguezek.

Guztia, Alimentu Bankura
Jasotzen den janari guztia Oiar­tzungo Alimentu Ban­kura eramaten dute, eta handik banatzen da elkarte edo talde ezberdinetara, tartean, Hernaniko EBTra.

Alimentu Bankutik, Gabriel Zelaiara
Hilabeteko aurreneko bi as­telehenetan jasotzen du EBTk janaria Alimentu Ban­kutik. Enpresa bat dute kontratatuta janaria Gabriel Ze­laia­ra ekartzeko. Guztia Hernanin dagoenean hasten da boluntarioen lana. Fur­goneta edo kamioiak deskargatu behar dituzte lehendabizi, eta guztia entregatzeko mo­duan jarri ondoren: ustelak alde batera utzi eta paketeak egin arra­tsaldeko banaketarako.