Turismoa egiteko aukera polita daukate gaur Hernani pixka bat gehiago ezagutu nahi dutenek. Kaxko historikoak hainbat etxe, jauregi eta eraikin dauzka balio izugarria dutenak, eta Hernaniren historia esplikatzeko balio dutenak. Gida baten azalpenak entzunez pauso batzuk eman, eta ondoren sagardotegira, Hernaniren historiaren beste ardatz bat ezagutzera. Han probaketa egin (gaztetxoentzat muztioa ere izaten da), sagardogileak lagunduta, eta ondoren herrira buelta, berriz ere tren berdean, Hernaniko bazterrak ikusiaz, eta han ere herriari buruzko beste azalpen kurioso batzuk entzunez. Goiz pasa egiteko plana da. Goizeko 10:30etan hasi eta eguerdira bitarte irauten du eskaintzak.
Plan ezinhobea, taldean edo familian egiteko
Gaur eta datorren larunbatean egin liteke plan hori, txotx denboraldiko eskaintza bat baita. Lehenbailehen izena ematea komeni da, eta gaur lekurik ez badago, datorren asterako izango da aukera. Hiru prezio ezberdin izaten dira: 0-3 urtekoek dohainik dute; 4-15 urte bitartekoek 5 euro ordaindu behar dituzte; eta 16tik gorakoek 10 euro.
Astean zehar erreserbak egiteko hiru modu jarri dituzte: Turismo bulegora joanda (Biteri); telefonoz:
943 33 70 28 edo emailez: gurutze-e@hernani.net.