Agur, hainbeste jende eta istorio bildu dituen diskotekari

Larunbat eta igandetako plana izaten zen hernaniar eta inguruko herrietako gazte askorentzat, Young Play diskoteka: bakarka dantza Dj-aren erritmora eta ondoren, lentak, elkarrekin goxo-goxo dantzatzeko.
Young Play makrodiskotekak makina bat jende eta istorio bildu ditu urte hauetan eta bikote ugari ere sortu dira bertatik. Orduko aforoaren arabera, 8.000 lagun inguru sartu zitezkeen eta betetzea ohikoa izaten zen. Hainbeste pasadizo   bildu dituen txokoari agur esateko garaia iritsi da, ordea. Aurreko astean, astearte eta asteazkenean, diskotekaren zati bat bota zuten, sarrera nagusia zeukana.

Galarretako errotondatik Oriamendirako aldapan, aldaketak
Udalak obrak egingo ditu Ga­larretako errotondatik Oria­­men­diko aldapan zehar. Erre­pidea zabalduko du, bidegorria egingo du eta instalazioak berrituko ditu. Horrez gain, errotonda bat egingo dute bigarren zinturoiaren tunelaren parean. Obra horiengatik bota dute diskotekaren zatia. Erroton­da, aurrerago egingo diren proiektuekin lotzeko izango da: poligonoak... Aurrerago, beste errotonda bat ere egingo dute, Errekalde bidean, zerrategi inguruan.

Udal Artxiboaren arabera, 1974an zabaldua
Zenbait komunikabidetan Young Play 1964an ireki zela azaldu da, baina Udal Artxi­bo­ko datuen arabera, eraikuntza espedientea 1973-1975 urteetakoa da, beraz, urte ho­rie­tan eraiki eta ireki zen. Pu­blikoarentzat 1974an ireki zela uste da. Hori horrela, datorren urtean 40 urte beteko zituen.

3 etapa
Hernaniko diskoteka ezagunak etapa ezberdinak bizi izan ditu urte hauetan. Andres Anaudek ireki zuen, pub, diskoteka eta taberna ezberdinen jabea ze­nak. On­do­ren, Juanjo izeneko ba­tek erosi zuen eta hark egin zituen urte gehiena. 2005an utzi zuen eta ondoren, frantses batek eta beste sozio batek har­tu zuten. 2006an itxi zen. Izenak ere, hiru izan ditu diskotekak. Juanjo nagusi izan zen garaian, 2000 inguruan, dis­ko­teka gainbeheran hasi zen eta itxura aldatzea erabaki zuen. Orduan, Play izatera pa­sa zen. Hu­rrengo aldaketa, Juanjok utzi zuenean izan zen. Play the Music izena jarri zioten.
Asteburuetako musika saio­ez gain, beste hainbat ekitaldi ere egin dira Young Playn: makrofestak, modelo desfileak, erakusketak, bertso saioak... Llon­gue­ras pelukero ezagunak ere egin izan du erakusketa.

Garai bateko talde ezagunak eta egungo Dj ezagunak
Hasierako urteetan, momentuko musika talde eta banda ezagunen emanaldiak izaten ziren Young Playn. Azken urtee­tan, berriz, egungo Dj ezagunak aritu dira musika jartzen: Willy Da House, Mo­nica X, Jesus Play, Dj Nano...

Materiala, biltzen
Diskotekaren azken urtean, sare sozialak lantzen hasi zi­ren eta Facebooken kontua ire­ki zuten. 2006an, Play the Mu­sic itxi zenean, kontua geldirik geratu zen, baina 2010ean, mar­txan jarri zuten berriz. Material ugari zegoela eta,  igotzea pentsatu zuten. Ar­gaz­kiak ikusi eta orduko saio­ak entzun daitezke. Facebooken Discoteca Young Play jarrita azaltzen da.  Materiala bil­tzen ari dira oraindik.