Sagardoaren kultura eta turismoa bultzatzeko elkarte berria aurkeztu zuten atzo Donostiako Aquariumean: Bizi Sagardoa elkartea. Euskal Herriko lau probintzietako elkarteak (67 sagardotegi biltzen dituzte), 9 udal, fundazioak, museoak, hezkuntza zentroak... Guztira 30 eragilek sortu dute taldea eta tartean da Ereñotzuko Auzo Udala, besteak beste. Atzoko ekitaldian babesa azaldu zioten elkarte honi, Donostiako Aquariumak (Bixente Zaragueta hernaniarrak hitz egin zuen, hain justu), Eusko Jaurlaritzak, Bizkaiko Diputazioak, eta Basquetour Agentziak.
«Ekitaldi historikoa, EHko sagardoaren historian»
Parte hartzaile guztiek azpimarratu zutenez, atzoko ekitaldia historikoa izan da Euskal Herriko sagardoarentzat: «Historikoa da gaurko ekitaldia, inoiz ez baita proiekturik gauzatu, Euskal Herriko lurralde desberdinetako hainbeste eragile lotuko dituenik». Hernaniar gehiago ere izan ziren atzoko ekitaldian. Arantxa Eguzkitza Gipuzkoako Sagardogileen Elkarteko lehendakariak azaldu zuenez, ateak zabalik dituzte elkarteko kide izan nahi duten eragile guztientzat. Jakoba Errekondo Zerain Dezagun Fundazioko arduradunak hiru hitzetan laburbildu zuen atzokoa: Aniztasuna, Elkartasuna eta Etorkizuna. «Inoiz sortu den talderik anitzena da hau, era guztietako eragileak biltzen dituelako. Sagardoak sekulako garrantzia izan du gure historian, eta hori da etorkizunean saltzen jakin behar duguna».
Parte hartzaileak:
-Gipuzkoako Sagardogileen Elkartea
-Bizkaiko Sagardogileen Elkartea
-Arabako Sagardogileen Elkartea
-Nafarroako Sagardogileen Elkartea
-Ereñotzuko Auzo Udala
-Zubietako Auzo Udala
-Zeraingo Udala
-Aiako Udala
-Aramaioko Udala
-Abaltzisketako Udala
-Baztango Udala
-Cuadrilla de Zuia
-Valle de Aranako Udala
-Ezkio-Itsasoko Udala
-Igartubeiti Baserri Museoa
-Zerain Dezagun Fundazioa
-Aramaioko Frutagileen Elkartea
-Jo Hala Jo Elkartea
-Usurbilgo Sagardoaren Lagunak
-Usurbilgo Baserritarren Kooperatiba
-Albaola Elkartea
-Urkiola Landa Garapenerako Alkartea
-Polunpak Elkarte Musiko-Kulturala
-Zehazten Zerbitzu Kulturalak
-Aldabe Zerbitzu Turistikoak
-Usurbilgo Sagastia EM
-Sagardoa eta Sagarra Unibertsitatea