Hamabost urte eta gero, hamabost urte zaharrago, hamabost urte berriago bueltan da Sen taldea; hitz horiekin anuntziatu zuten euren web orrian, itzulera. Hasierako lau gazteek egin dute bat berriz ere, tartean, Aieko Zubimendi baterijole hernanirrak. Kontzertuak emateko asmoarekin itzuli dira momentuz, eta bi eman dituzte dagoeneko. Udara ere, lanpetuta pasatzeko gogoz dira, eta badituzte zenbait fetxa itxita; gehienak, herrietako jaietan.
Usurbilgo kontzertua
«oso berezia»
Urduritasuna, ilusioa, azken orduko zalantzak... era guztietako sentimentu kontrajarriak zituzten itzulerako kontzertuaren aurretik. Berezia izan zen oso, Usurbilen eman zuten aurreneko kontzertua eta hala aitortu dio Aieko Zubimendi hernaniarrak Kronikari: «oso berezia izan zen, ez dugu berehalakoan ahaztuko. 10 urte eta gero, berriro lauak eszenatokira igotzea. Leporaino bete zen gaztetxea, eta jendearen jarrera ezin hobea izan zen».
Gaztedanbadan eman zuten bigarren kontzertua, eszenatoki haundiago batean, jende gehiagoren aurrean «ezberdina izan zen, baina emozionantea aldi berean».
Betiko kantak,
eta `Izarrak berri´
Sen taldea betidanik ezagutzen dutenek, kontzertuetan denboran atzera egin dutela sentituko dute. Betiko kantak jotzen dituzte, taldearen doinu eta himno bihurtu direnak.
Hala ere, itzulerarekin batera Izarrak berri abestia grabatu dute, Sen taldeari omenalditxo bat egiteko asmoz. Irratietan askotan jartzen dute, eta bideoklipa ere ikus daiteke Youtuben.