«Liztor asiatikoaren erreginak orain ari dira kabi primarioak egiten eta orain da garaia suntsitzeko. Kabi ba-koitzetik 200 erregina aterako lirateke eta horregatik, askoz eraginkorragoa da orain», azaldu zuen atzo prentsaurrean Luis Intxauspe alkateak. Hernaniko Udalak, Buruntzaldeko beste Udalekin batera eta Donostia eta Oarsoaleko Udalekin batera, kanpaina bat jarri du martxan liztor asiatikoaren kabi primario horiek kentzeko eta horren berri eman zuten atzo prentsaurrean. Herritarren parte hartzea behar-beharrezkoa dela azpimarratu zuten: «Udalak parte hartzea garrantzitsua da, baina Udala ez da denera iristen eta herritarrekin biderkatu egingo da prebentzio lan hori».
Oso txikiak, edozeinek suntsitzeko modukoak
Marijo Garcia Hernaniko Babes Zibileko teknikariak azaldu zuen, kabi primario horiek oso txikiak direla, etxe inguruetan egoten direla eta edozeinek suntsitu ditzazkeela.
Nola kendu ere azaldu zuen: «Beti eguzkia atera aurretik edo sartu ostean kendu behar dira, liztor guztiak barruan daudela ziurtatzeko; batez ere, erregina. Kabia plastikozko poltsa batekin edo ur bidoi batekin estali behar da. Zulotxo bat egin, eta etxean dugun edozein intsektizida bota. 10-20 minutuan hilko dira guztiak, eta ondoren kabia kendu eta suntsitu egin behar da».
Diptikoak etxeetan eta
hitzaldia, gaur zortzi
Herritarrak behar bezala informatzeko, diptikoak banatuko ditu etxez etxe Udalak. Kanpaina martxan duten Udal guztiak kontuan hartuta, 29.000 diptiko banatuko dira; horietatik 8.000 Hernanin.
Kartelak ere jarriko dituzte umeak ibiltzen diren guneetan.
Horrez gain, hitzaldiak antolatu dituzte eta Hernanin datorren ostegunean izango da. Ereñotzun, berriz, apirilaren 27an.
Boluntario taldeak
Udan, iaz
Diputazioak martxan jarritako protokoloak jarraituko du, hau da, kabi haundiak suntsitzeko protokoloak: suhiltzaileek, hiriguneetako eta eskura dituzten kabiak kenduko dituzte, eta basozainek, gainerakoak. Tiroka suntsituko dituzte. Gipuzkoa osoan, 5 talde egongo dira, bina basozainez osatuta.
Eta oraingo kanpaina, udaberrikoa izango da. Beste pauso bat liztor asiatikoaren hedapena kontrolatzeko. Kanpaina honetarako eta etorkizunerako, figura berri bat ere sortu nahi dute: boluntario taldea. «Herriko ehiztariekin ere hitz egiteko asmoa dugu», azaldu zuen Garciak. Izan ere, argi dute arazoa ez dela erlezainena bakarrik: «kontua ez da eztia gutxituko dela bakarrik, erleek polinizazioaren %80a egiten dute».
Bestalde, tranpen eraginkortasunarekin zalantzak baldin badaude ere, leku jakin batzuetan jartzeko asmoa dauka Udalak. Denera, 9 jarriko ditu eta horien eraginkortasuna aztertuko du.
Trajeak eta pertigak,
erlezainen eskura
Kabiak kentzen, erlezainek egiten duten lana kontuan hartuta, euren eskura jarriko ditu Udalak, zenbait traje berezi eta 20 m-ra iristen diren hainbat pertiga.