PARTIDU berdindua izan zen atzokoa. Gogor borrokatu zuen Hernanik hasieratik, Gernika ondo eutsiz, azken emaitza ordea, ez zen egindako lanaren adibide izan. 6-17 galdu zuen Hernanik basurdeen kontra, eta geroz eta zailago du mailari eustea promozioa jokatu gabe.
Gernika berehala aurretik
Minutu bat besterik ez zuen behar izan Gernikak markagailuan aurretik jartzeko; Iñigo Olaetak zigor kolpea sartu eta 0-3 aurreratu ziren bizkaitarrak. Hernani ez zen kikildu, eta lanean jarraitu zuen, markagailuari buelta emateko asmoz. 14garren minutuan etorri zen saria: Xabat Erroizeneak egin zuen entsaioa; eta Igor Genuak, gauzatu. Aurretik ziren hernaniarrak, eta partidua irabazteko esperantzak bizirik jarraitzen zuen. Lehengo zatiaren erdialdean entsaioa egin zuen Olaetak; eta berak gauzatu zuen. Atsedenaldira joan aurretik, jokalari berak aldea haunditu zuen zigor kolpe batekin, 7-13.
Hernani erasoan, Gernika sendo defentsan
Sei punturen aldea eta berrogei minutu aurretik. Asko zegoen jokoan oraindik bigarren zati hasieran. Hernani konbentzituta atera zen berdegunera, eta Gernikaren zelaian, atakatu eta atakatu aritu zen bigarren zati ia osoan. Gernikarrek sendo eutsi zuten ordea Hernani, eta okasio garbiak izan bazituzten ere, baten defentsak eta bestearen akatsek, bere horretan utzi zuten markagailua. Bukatzeko minutu gutxiren faltan, laugarren eta azkeneko zigor kolpea sartu zuen Gernikak eta Iñigo Olaetak.
Zaila mailari eustea promozioa jokatu gabe
Promozioa jokatu gabe, matematikoki mailari eusteko aukera badu oraindik Hernanik. Hurrengo sailkatua 5 puntura du, baina berak, geratzen diren partiduak irabazi behar ditu. Eta ez ditu nolanahiko aurkariak izango. Datorren partidua VRAC liderraren kontra jokatuko du; eta azkena, Santboianaren kontra.