kolpera loratzen da gereziondoa, eta hain ikusgarria izaki, modan jartzen ari da herriguneetan. Leku gutxitan ezagutuko dituzte ordea, Hernanin bezala lore zuriak eta arrosak batera ematen dituzten gereziondoak. Lizeaga kale hasieran dago gereziondo japoniarra, itxuraz besteak bezalakoxea, baina udaberri hasieran denak harritzen dituena. Ezin ukatu, kuriosoa behintzat badela arbola hau. Zergati bat badu horrek, eta ez da arbolaren berezko kapritxo bat. Berez bi gerezi klase dira arbola horretan: bat, oinarrian dagoen espeziea da (prunus avium), eta bestea gainean txertatu zaion espeziea (prunus kanzan); oinarrian dagoena txuria, eta gainekoa arrosa.
Espektakulu haundiena, Extremaduran
Gereziondo baten loreak jendearen arreta pizten badu, gereziondoz betetako mendia loretan lehertzean turismo uholdea erakartzen du. Hori gertatzen da Extremaduran, Jerte bailaran, martxo inguruan. Hernanin ere garai horretan egiten da Extremadurako festa, eta gaur eta bihar izango da aukera Atsegindegin, harako foiletoren bat edo beste eskuratzeko.
Japonian, lore sakratua
Dena dela, gereziondo japoniarra da Hernanin dagoena, eta hain justu herrialde horrek gurtzen du lore hau, inon baino gehiago. Sakura deitzen diote gereziondoari, eta loraldian dagoenean Hanami festa egiten dute: gereziondoaren azpian jarri, eta otordua egiten dute. Horrez gain, ikasturtea ere oraintxe hasten dute Japonen. Ezagutzen ote dute japoniarrek gure lore arrosa eta zuriko gereziondoa?