Ugaitz Errazkin euskal preso politiko hernaniarra bisitak jasotzeko arazo haundiak izaten ari dela salatu dute Hernaniko senideek. Errazkin Fresneseko espetxean dago, eta Kronikara bidalitako oharrean azaldu dutenez, bikoteak eta lagunek izaten dituzte arazoak presoa bisitatzerakoan: «bikoteari ez diote kristal gabeko bisita intimorik izaten uzten, eta gainera Ugaitz biluzarazi egiten dute neskalaguna ikusi aurretik. Espetxearen zuzendariarekin bildu zen neskalaguna, eta honek arazoa konponduko zela esan zion. Asteburu honetan izan du hurrengo bisita, eta arazoak bere horretan jarraitzen du».
Egoera salatzeko kanpaina jarri dute martxan senideek. Helburua da eskutitzak bidaltzea Le Vert epaileari, arazoa konpontzeko eskatuz.
Eskutitz ereduak,
gaurko kontzentrazioan
Kontzentrazioa egingo dute gaur Zinkoeneako errotondan, 20:00etan, eta bertan banatuko dituzte eskutitz ereduak. Lema izango da: Gaixo larriak eta kondena osoa betea duten presoak etxera.