Azucena Vieites hernaniarraren ‘collageak’ Madrilgo Reina Sofia museoan

Azucena Vieites Garciak (1967, Hernani) erakusketa jarri du Madrilgo Reina Sofia  museoan. 12 collage dira, al­diz­kari edo fanzineetatik har­tutako irudiekin eginak, eta serigrafia bidez haundituak. Horrela, beste norbaitek sor­tutako irudiak hartu, colla­ge bidez original bihurtu, eta ostera serigrafiarekin kopia itxura ematen die.
Erakusketaren izena da Tableau vivant (koadro bizia), eta arte garaikideko museoan dago, ekainaren 22ra arte, Fisuras izeneko programan, orain arte Juan Perez Agirre­goikoa donostiarraren lanak egon diren lekuan. Protokolo Salan dago erakusketa, eta 12 obraz gain, bideo bat ere badu, koadroak egiteko pro­zesua azaltzen duena. Horrez gain, bere koadro gehiago ere badaude, 4-6 urteko umeek kolorezta­tuak, Reina Sofian bertan egindako ikastaroan.

«Irudi izoztuak» eta
«koadro biziak»
Obraren izenak badu bere garrantzia. Tableau vivant fran­tsesez esaten zaio artistak era­biltzeari liburu edo koa­droe­tako gertaerak errepre­sen­­tatzeko. Alde horretatik «irudi izoztuak» direla dio Vieitesek, baina aldi berean ekintza bat errepresentatzen dutenez, «koa­dro bizi-biziak» direla dioenik ere badago.
Inguruko gertaerak auke­ra­tzen ditu Vieitesek, aldiz­ka­rie­tatik atereak adibidez. Orain­daino,­ irudi horiek ma­rrazki bi­hur­tzen zituen; orain­­goan al­diz, zuzenean ekarri ditu bere obrara, co­llage moduan. Gero serigrafia bidez haunditu egin ditu, eta originala kopia bihurtu du, ostera.

«Kopiak badu duintasuna»
Vieitesen lanean beti izan du garrantzia kopiak. Kopiak, erre­pikapenak, fragmentu be­ra behin eta berriz erabil­tzeak... Reina Sofiako era­kus­ketan, kopiari oraindik eta duin­tasun haundiagoa eman zaio, serigrafia bidez haunditu egin direlako. «Kalitate haun­diko irudiak geratu dira, eta horrek kopiari behar duen duin­tasuna eman dio». Izan ere, Vieitesek beti kendu nahi izan dio garrantzia irudi abso­lu­tuei edo narrazioak marra xuxen-xuxenekin egiteari.

‘Egizu zerorrek’
Hernaniko artistak artisau la­na egin du erakusketa honetan ere. Teknologia bat eta beste erabili ditu, baina birtuosis­moa­ri garrantzia kendu nahi izan dio. Do It Yourself filoso­fia­ri segika, punk garaiko edo dadaismo garaiko Egizu zero­rrek filosofia maite du Viei­te­sek, feminismoari oso lotua da­goena, baita ere. «Gitarra jo­tze­ko ez dago solfeoa jakin beha­rrik; nahikoa da gogoa izatea». Horrela, azpiegitura haundie­gi­rik gabe egin dezake lana ar­tistak, modu azkar, ekonomiko eta erraz xamar batean.

Prozesu osoa, bideoan
Erakusketaren zati nagusitik aparte, badira umeek kolorez­ta­tutako beste koadro batzuk, eta baita bideo bat ere. Bideo horrek biltzen du prozesu guz­tia, koadro bakoitza egi­teko prozesua, alegia.

Azucena Vieites Garcia
1967, Hernani

1991 Lizentziatu Arte Ederretan (EHU), Ikusentzunezkoak eta Pintura espezialitatean.
1992 Sorkuntza Beka jaso Gipuzkoako Foru Aldundiaren (GFA) eskutik, Arte Plastikoetarako.
1993 3. Saria Artista Hasiberrien Donostiako Sarian.
1993 Parte hartzaile, Artelekuko Uztaro erakusketan.
1994 Elkarte bat sortu Erreakzioa, E. Sadaba eta Y. De los Blueisekin batera. Artea eta feminismoa elkartzeko praktika artistikoa, kulturala eta aktibista sortu zuten.
1995 Artelekun hainbat tailerretan parte hartu. Adibidez, Serigrafia (P.Albacete) edo Elektrografia (J.R.Alcala eta J.Pastor).
1996 Mojácar-ko Arte Beka.
1996 Erakusketak: Dinamarkan, Humlebaek-eko Museum of Modern Art-en. Bizkaian, El puñalito y un puñao erakusketa - Emakumeen Dokumentazio eta Ikasketa Zentrua.
1997 Bakarka lehenengo aldiz, Galeria DV erakusketan.
1997 Sujetiles. Tres escenarios erakusketa ibiltarian parte hartu, Madril, Donostia, Barcelona...
1998 Promozio Beka, (GFA).
1999 Sorkuntza Beka (GFA), Arte Plastikoetarako.
2002 Arte Beka (Caja Madrid).
2004 Gure Artea Saria irabazi
I. Garmendia eta I. Aranbarrirekin.
2005 Erakusketa Rekalden (Bilbo)
2009 Erakusketa Fucares galerian (Madril), Collages.
2009 Erakusketa Montehermoson (Gasteiz), Break Out of Your Shell
2011 Erakusketa Madrilen, Coloring Book
2011 Erakusketa Moriarty-n (Madril) El momento es ahora
2011 Erakusketa Moriarty-n (Madril) El momento es ahora
2012 Erakusketa MUSACen (Leon), Fundido encadenado.