«Duela bi hilabete, urtarrilaren 23an, Udal ondareari buruzko informazioa eskatu genuen. Bata, Osiñaga auzoan dagoen lurzati baten ingurukoa eta bestea, Martindegi auzoko bide publiko batena. Udal Gobernuak, bi hilabetetan ez du astirik izan azalpenak emateko», azaldu du Hamaikabat alderdiak prentsa ohar bidez. Eta gaineratu du: «Hamaikabatentzat, Udal Gobernuak utzikeria erakusten du ondare publikoaren defentsan eta hori da publikoki salatu nahi duguna».
H1!-ek argi utzi du, ez duela amore emango eskatutako informazioa eskuratu arte.
Bi eskari
H1!-ek bi eskari egin ditu: «Alde batetik, Lepatxiki eta Pardiola baserrien inguruan Udalak duen lursoroari buruzko auziaren azken informazioa jaso nahi dugu.
Eta bestetik, Martindegi auzoko Senperena-Telleriberri eremuko bide publikoari buruzko berri jakin nahi dugu. Hor, bide publikoa zegokion modura egokitzeko eskaera egin zen eta jakin nahiko genuke eskaera hori gauzatzeko, ze erabaki hartu diren, edota hartuko diren».